Shyǵys Qazaqstan oblysyndaǵy Geologııalyq barlaý kolledji qazaqstandyq, sondaı-aq sheteldik geologııalyq barlaý kompanııalarymen áriptestik ornatqan. Sonyń nátıjesinde, oqý ornynyń júzdegen stýdenti men túlegi Qazaqstanda ǵana emes, Batys Eýropa, Soltústik Amerıka, Ońtústik-Shyǵys Azııa, TMD, tipti Afrıka elderinde jumys istep, óndiristik tájirıbeden ótip jatyr.
Bilim jáne ǵylym mınıstrliginiń málimdeýinshe, Geologııalyq barlaý kolledjiniń túlekteri jumysqa ornalastyrý deńgeıi 96%-dy quraıdy. Mundaı nátıje oqý ornyndaǵy júıeli jumystyń jemisi ispetti. Sebebi atalǵan kolledjde Kásiptik baǵdar berý, jumysqa ornalastyrý jáne monıtorıng bólimi jumys isteıdi. TjKB uıymdarynyń jumys berýshilermen qol jetkizgen kelisimderiniń nátıjesinde túlekter jumysqa ornalastyryldy, al kolledj stýdentteri elimizde jáne shetelde eńbegi tólenetin praktıkadan ótedi. Jyl saıyn kolledjge Qazaqstannyń barlyq óńirinen eki júzden asa talapker oqýǵa túsedi.
Geologııalyq barlaý kolledjiniń dırektory Ardaq Ádiljanov: «Kolledj óz stýdentteriniń tájirıbeden ótip, odan ári sol jerde jumys isteýi úshin iri kompanııalarmen baılanys ornatady. Búgingi tańda 250-den asa geologııalyq kásiporyn bizdiń turaqty seriktesterimizge aınalǵan jáne uıymdar arasynda praktıkanttar men jas mamandarǵa degen suranys óte joǵary. Tájirıbeden ótýshilerdiń 90%-y jalaqy alady. Sheteldik qyzmetkerlerdi qazaqstandyq mamandarmen kezeń-kezeńmen aýystyrýdy kózdeıtin Kadrlardy ulttandyrý baǵdarlamasyna sáıkes, kolledj el aýmaǵynda jumys isteıtin halyqaralyq kompanııalarmen yntymaqtastyq ornatyp otyr», deıdi.
Kolledj seriktesteriniń qatarynda «Qazatomónerkásip» UAK» AQ, «Qazaqmys», KazMinerals, Aurora Minerals Group, Rio Tinto, Schlumberger, «Kazsınk» jáne basqa da kásiporyndar bar.
Taǵy bir eskeretin dúnıe, atalǵan oqý orny jumysqa ornalasqannan keıin de kolledj túlekterimen baılanysta bolady. Bul kásiporyn jabylǵan nemese kadrlar qysqarǵan jaǵdaıda kolledj stýdentterin odan ári jumysqa ornalastyrý úshin qajet.
Kolledj ákimshiliginiń aqparatyna súıensek, 90 jyldyq tarıhynda kásiptik bilim beretin oqý orny 18 myń bilikti orta býyn geolog mamandaryn daıarlap shyǵarǵan. Kóptegen túlek iri kompanııalardyń, Ekologııa, geologııa jáne tabıǵı resýrstar mınıstrligine qarasty uıymdardyń basshylyq laýazymdarynda qyzmet etip jatyr.