2022 jyldyń aqpan aıynda ekinshi deńgeıli bankter men jekelegen banktik emes aıyrbastaý pýnkteri jalpy salmaǵy 82 keli bolatyn 2 586 altyn quımasyn satty, dep habarlaıdy Egemen.kz Ulttyq banktiń baspasóz qyzmetine silteme jasap.
Halyqqa tazartylǵan altyn quımalardy satý jáne satyp alý baǵdarlamasyn Ulttyq bank 2017 jyly iske qosqan bolatyn. Baǵdarlama qolǵa alynǵaly jalpy salmaǵy 2,9 tonnaǵa jýyq 79 262 altyn quıma satylǵan.
Altyn quımalar 5, 10, 20, 50 jáne 100 gramdyq bolyp bes túrli salmaqta usynylady. Satyp alýshylar arasynda óte joǵary suranysqa ıe túri – 10 gramdyq altyn quıma. Jalpy satylǵan quımalar arasynda onyń úlesi – 27%, ıaǵnı, 21 646 dana.
Odan keıin 100 gramdyq quıma suranysqa ıe, 17 491 dana (22%) satylǵan, 20 gramdyq quımadan 15 283 dana (19%), 5 gramdyq quımadan 14 239 dana (18%), 50 gramdyq quımadan 10 603 dana (14%) satyldy.
Altyn quımalar Almaty, Nur-Sultan jáne Atyraý qalalarynda kóp satylady.
Qarjy naryǵyndaǵy turaqsyzdyq pen aıyrbastaý baǵamy qubylmaly bolyp turǵan jaǵdaıda altyn quımalaryna ınvestısııa salý jınaqtardyń saqtalýyn qamtamasyz etetin balama qural bola alady.
Altyn quımalar naryǵyndaǵy ótimdiliktiń basty kepili – bank pen banktik emes aıyrbastaý pýnkteri klıentke aqshany sol kúni tóleı otyryp, altyn quımalardy keri satyp ala alady.