Oblys halqymen jańa format aıasynda eseptik kezdesýler ótkizip júrgen óńir basshysy Jeńis Qasymbek bul joly Buqar jyraý aýdanyna baryp, sondaǵy birqatar aýyldyń turǵyndarymen júzdesti. Iá, alystaǵy aýylǵa, shalǵaıdaǵy aýdanǵa baryp, halyqpen betpe-bet otyryp sóılesý, olardyń ótinish-tilegin, syn-eskertpesin óz qulaǵyńmen estý – bul ákimderdi qara halyqqa jaqyndata túsetin alǵyshart.
Sondaı kezdesýlerdiń biri Qyzyljar aýylynda ótti. Qazirgi tańda bul eldi mekende 800-ge tarta adam turady. Aýylda medısınalyq beket bar, feldsher jumys isteıdi. Biraq mundaǵy eski ǵımarat jóndeýdi qajet etedi eken. Osy oraıda oblys basshysy jergilikti jurtqa qýanyshty jańalyqty jetkizdi. Bıyl atalǵan aýylda jańa feldsherlik-akýsherlik pýnkttiń qurylysy bastalady.
Qyzyljardaǵy taǵy bir másele – bos turǵan sport zalynyń jaı-kúıi. Qaraýsyz qalǵan ǵımarat buzyla bastaǵan. Kezdesýde jergilikti turǵyn Amangeldi Esenǵalı nysannyń osyndaı kúıge túskenine qynjylys bildirdi.
– Bala kezimnen Qyzyljarda turamyn. Osy sport zalda kúrespen aınalystym. Talaı chempıondar shyqqan altyn uıa edi. Aýylda sport zaly bolmaǵan soń balalar nemen aınalysaryn bilmeı, bos júr. Al endi osy ǵımaratty jóndep berse, biz úshin bul úlken qýanysh bolar edi, – deıdi ol.
О́z kezeginde oblys ákimi sport ǵımaratyn jóndeýge konkýrs jarııalanǵanyn aıtyp, qyzyljarlyqtardy taǵy bir jaǵymdy jańalyqpen qýantty. Sátin salsa, atalǵan sport zaly aldaǵy ýaqytta adam tanymastaı kúıge enedi dep sendirdi ol.
Rastovka aýylynda turǵyndar mektep-ınternatta júrgizilgen jóndeý jumystary sapasynyń kóńil kónshitpeıtinin aıtyp, sondaı-aq bilim ordasyndaǵy pedagogıkalyq kadrlardyń tapshylyǵyn da tilge tıek etti.
Osy jaıttan habardar bolǵan oblys ákimi jóndeý júrgizgen merdigerdiń jumysyn baǵalaıtyn komıssııa qurý qajettiligin aıtty. «Barlyq kemshilikti kompanııa kepildik boıynsha joıýy kerek», dep shegeledi ol.
Jalpy, atalǵan aýylda ishki joldar asfalttalyp jatyr eken. Birazy byltyr iske asyrylsa, qalǵany bıyl aıaqtalýy tıis.
Al Botaqara mádenıet úıinde ótken kezdesýge aýdan ortalyǵynyń ǵana emes, basqa da aýyldardyń turǵyndary qatysyp, olar ózderin tolǵandyryp júrgen suraqtaryn tikeleı qoıýǵa múmkindik aldy. Ásirese, turǵyndardy qoldaǵy mal jaıylatyn jaıylym jerlerdiń jetispeýshiligi alańdatady eken. Kezdesýde bul máseleniń jer zańnamasy aıasynda retteletini aıtylyp, paıdalanylmaı jáne tıimsiz paıdalanyp kelgen jerlerdiń memleket menshigine qaıtarylyp, odan keıin olar aýyl halqynyń ıeligine beriletini málim etildi.
Sonymen qatar oblys ákimimen kezdesýde basqa da kóptegen másele kóterildi. Aýdan turǵyndary elektr júıeleriniń alańdatarlyq jaǵdaıy, sportpen aınalysýǵa oryn jetispeýshiligi, qurylys jáne jóndeý jumystarynyń jaıy sııaqty basqa da tolyp jatqan áleýmettik-ekonomıkalyq problemalardan bastap mal urlyǵynyń azaımaı turǵanyna deıingi máselelerdi ashyp aıtty. Turǵyndardy muqııat tyńdaǵan oblys ákimi Jeńis Qasymbek birqatar máseleni sol jerde birden sheship, al qordalanyp qalǵan jáne zertteýdi qajet etetin kúrdeli problemalardyń ýaqyt óte kele birte-birte sheshimin tabatynyna sendirdi.
Kezdesýde oblys ákimi Buqar jyraý aýdanynda oń dınamıka bar ekenin atap ótti. Turǵyn úıler salynyp, joldar jóndelýde.
– Mysaly, Doskeı aýylynda bes qabatty eki úıdiń kúrdeli jóndeý jumystary aıaqtalyp qaldy. Sondaı-aq oblystyq basqarmalar esebinen taǵy úsh úı qalpyna keltiriledi. Aýdanda «Aýyl – el besigi» arnaıy jobasynyń arqasynda aýyldardyń ınfraqurylymy jaqsarýda. Biraq sheshilmegen máseleler de az emes. Osy kezdesýdiń qorytyndysy boıynsha aıtylǵan usynystar men ótinish-tilekter eskerile otyryp, is-sharalar jospary ázirlenedi. Kelesi kezdesýde ne istelgeni týraly esep beremiz, – dedi J.Qasymbek.
Jalpy eseptik kezdesýge qatysqan aýdan halqy jańa formattaǵy júzdesýdiń kóńilden shyqqanyn aıtty. Solardyń biri Botaqara kentiniń turǵyny Raýshan Saǵyndyqova óziniń pikirin bildirdi.
– Kezdesýde men jerlesterimniń problemalary týraly aıtyp berdim. Ákimniń esebine birinshi ret kelip otyrǵan joqpyn. Osyndaı kezdesýler kóp bolýy kerek. Búkpesiz, ashyq dıalog boldy. Bizdiń máselelerimiz sheshiledi dep úmittenemiz. Halyqqa jaqyn bolý – bul óte jaqsy. Mundaı kezdesýler bılikke degen senimdi arttyrady, – dep aǵynan jaryldy aýdan turǵyny.
Qaraǵandy oblysy,
Buqar jyraý aýdany