Batys Qazaqstan oblysy Qaratóbe aýdanynyń Qoskól aýyldyq okrýgine qarasty Shalǵyn aýylyndaǵy tótenshe jaǵdaı tipti asqynyp ketti. Naýryz aıynyń 31-i kúni Shıli ózeniniń sýy kóterilip, aýyldyń 25 úıine sý kirgen. Úılerdiń aldy qulaı bastady degen habar bar, dep jazady Egemen.kz
Qaratóbe aýdanynyń eldimekenderinde qar sýynyń meılinshe erýi jáne sý tasý qaýpi jaǵdaıyna baılanysty Batys Qazaqstan oblystyq Tótenshe jaǵdaılar departamentinde jedel shtab quryldy.
Departamenttiń baspasóz qyzmetiniń habarlaýynsha, 2022 jylǵy 31 naýryzda saǵat 20.40-ta daǵdarys ortalyǵynda oblys ákiminiń orynbasary T.Meńdiǵalıevtiń tóraǵalyǵymen azamattyq qorǵaý organdary qyzmeti basshylarynyń qatysýymen jedel shtab otyrysy ótken. Otyrysta Shyńǵyrlaý, Qaratóbe aýdandaryndaǵy joldardy sý shaıý máselesi talqylanǵan.
Batys Qazaqstan oblystyq Tótenshe jaǵdaılar departamenti bastyǵynyń orynbasary polkovnık A.Toqanovtyń bastaýymen Qaratóbe aýdanyna avarııalyq-qutqarý, evakýasııalyq jáne shuǵyl jumystar úshin kúshter men quraldardyń jıyntyǵy jolǵa shyqty.
Qazirgi ýaqytta departament jáne oblys basshylyǵy jaǵdaıdy baǵalaý maqsatynda tikushaqpen sý tasqyny qaýipti aýmaqtarǵa attanǵan. Shalǵyn aýylynda sý kirgen 25 turǵyn úıdiń turǵyndary mádenıet úıine kóshirilgen. «Turǵyndardy kóshirý máselesi qarastyrylýda. Shalǵyn aýyly qatań baqylaýda» dep habarlaıdy departamenttegiler.
Aıta keteıik, osydan bir kún buryn Qaratóbe aýdanynyń Aqtaısaı aýyly tusynda erigen qar sýy aýdan ortalyǵymen baılanysatyn jol men bógetti buzyp ketken edi. Atalǵan aýylmen jol baılanysy toqtaǵan.
Shyńǵyrlaý aýdanynda da qardyń qarqyndy erýinen «Shyńǵyrlaý-Aqshat-Segizsaı» qara jolynyń birneshe jerin erigen sý jyryp ótken. Tótenshelikterdiń aıtýynsha, bul baǵytta eldi mekenderge qaýip tónip turǵan joq.
«Jergilikti atqarýshy organdardyń kúshimen táýlik boıy kezekshilik uıymdastyryldy, qazirgi ýaqytta sý deńgeıiniń tómendeýi baıqalady. Joldy qalpyna keltirý jumystaryn erigen sý azaıǵannan keıin júrgizý josparlanýda» deıdi atalmysh mekemeniń baspasóz hatshysy Bákızat Maǵzenova.
Osy kúnderi Terekti aýdanyna qarasty Tóńkeris aýyly turǵyndarynyń da Memleket basshysy Qasym-Jomart Toqaevqa joldaǵan beıne-úndeýi jelige tarap jatyr. Bul aýyl turǵyndary da jol, aýyz sý tapshylyǵyna narazy.
Sońǵy aqparattarǵa qaraǵanda, Shyńǵyrlaý aýdanyndaǵy Almaz aýylynyń kireberisindegi kópirdi de sý shaıyp ketken.
Báıterek aýdanyndaǵy О́rken aýylyna da sý kirip, bir-eki aýlany basqany, bir úıdiń monshasyna sý kirgeni habarlandy. Biraq bul aýylǵa tóngen qaýip seıilgen.