Atyraý ınjenerlik-gýmanıtarlyq ınstıtýty bas lısenzııasynan aıyryldy. Mundaı sheshimdi Atyraý oblysynyń mamandandyrylǵan aýdanaralyq ákimshilik soty shyǵardy, dep habarlaıdy Egemen.kz Bilim jáne ǵylym salasyndaǵy sapany qamtamasyz etý komıtetiniń baspasóz qyzmetine silteme jasap.
QR BǴM baspasóz qyzmetiniń habarlaýynsha, vedomstvonyń Bilim jáne ǵylym salasyndaǵy sapany qamtamasyz etý komıteti ýnıversıtet jumysynan kóptegen zań buzýshylyqty anyqtaǵan. Ýnıversıtette bilim berý uıymdary qyzmetiniń úlgilik erejeleri, memlekettik jalpyǵa mindetti standart talaptary, sondaı-aq biliktilik talaptary saqtalmaǵan.
«Ýnıversıtetti tekserý barysynda kóptegen zań buzýshylyq anyqtaldy. Mysaly, oqytýshylardyń bir ýaqytta ár túrli tilde oqytatyn eki túrli topta sabaq ótkizý faktileri. Biraq muǵalimderdiń oqý júktemesinde ár top boıynsha aýdıtorııalyq sabaqtar bólek eseptelgen. Odan bólek, ýnıversıtette keıbir sabaqtar múldem ótkizilmegen. Bilim berý baǵdarlamalaryn ázirleý jáne bekitý kezinde zań buzýshylyqtarǵa jol berilgen. Sonymen birge Atyraý ınjenerlik-gýmanıtarlyq ınstıtýtynyń stýdentterdi oqytqan bilim berý baǵdarlamalary QR BǴM tizilimine engizilgen baǵdarlamalarǵa sáıkes kelmedi. Nátıjesinde stýdentter oqý pánderin tolyq meńgermegen. Sondaı-aq oqý prosesi sapaly professorlyq-oqytýshylyq kadrmen qamtamasyz etilmegen», dedi BǴM Bilim jáne ǵylym salasyndaǵy sapany qamtamasyz etý komıtetiniń basqarma basshysy Elvıra Saparbekova.
Tekserý Atyraý ınjenerlik-gýmanıtarlyq ınstıtýtynda sapany qamtamasyz etýdiń ishki júıesi men qajetti materıaldyq-tehnıkalyq bazanyń joqtyǵyn kórsetti. Birqatar bilim berý baǵdarlamasy boıynsha oqý, ádistemelik jáne ǵylymı ádebıetter joq, ıaǵnı stýdentterdiń sapaly bilim alýyna jaǵdaı jasalmaǵan. Muny test tapsyrǵan stýdentterdiń bilim nátıjeleri rastady. Iаǵnı ınstıtýt stýdentteriniń 90 paıyzy shekti baldy jınaı almady.
Aıta keteıik, úlgilik qaǵıdalardyń normalaryna sáıkes stýdentter ýnıversıtet lısenzııasynan aıyrylǵan sátten bastap oqýyn jalǵastyrý úshin basqa JOO-ǵa aýysýǵa quqyly.