Almatyda qala ákimi Erbolat Dosaevtyń qatysýymen jalpyqalalyq senbilik ótti. Aýlalardy, saıabaqtar men skverlerdi, sý qoımalarynyń jaǵalaýlaryn tazalaýǵa 60 myńnan astam turǵyn qatysty, dep habarlaıdy Egemen.kz Almaty qalasy ákimdiginiń baspasóz qyzmetine silteme jasap.
Ekologııalyq aksııa barysynda saq qorǵandarynyń aýmaǵynda, Alataý aýdanynyń Qaraǵaıly ormanynda, Saıran kóli men Qarǵaly ózeniniń jaǵasynda jappaı aǵash otyrǵyzý júrgizildi. Barlyǵy 5 myńnan astam aǵash otyrǵyzylǵan.
Senbilik kezinde qalanyń estetıkalyq túrin jaqsartý boıynsha jumystar júrgizildi: týrnıketter, tirekter, oryndyqtar, ýrnalar syrlandy.
Qoqysty shyǵarý úshin qalanyń kommýnaldyq qyzmetteri men kásiporyndarynyń 502 birlik arnaıy tehnıkasy tartyldy. Qala turǵyndary barlyǵy 10 910 tekshe metr qoqys jınaǵan.