Qazaqstan Prezıdenti Qasym-Jomart Toqaev Rım Papasy Fransıskpen ekijaqty kelissóz júrgizdi. Kelissóz beınebaılanys rejıminde ótti, dep habarlaıdy Egemen.kz Aqordanyń resmı saıtyna silteme jasap.
Kezdesý barysynda Qazaqstan men Vatıkan arasyndaǵy yntymaqtastyqty nyǵaıtýdyń perspektıvalary, onyń ishinde konfessııaaralyq kelisim men dinaralyq dıalogty ilgeriletý máseleleri kóterildi.
Kelissóz barysynda bıylǵy qyrkúıek aıynda ótetin Álemdik jáne dástúrli dinder kóshbasshylarynyń VII sezi talqylandy. Atalǵan forým Nur-Sultan qalasynda ótetinin aıta ketken jón. Sondyqtan Qasym-Jomart Toqaev bul forýmnyń Qazaqstan úshin mańyzy zor ekenin atap ótti.
Prezıdent konfessııaaralyq kelisim men birliktiń qazaqstandyq modeli týraly aıtty. Sondaı-aq Memleket basshysy Rım Papasyna Qazaqstanda júzege asyrylyp jatqan aýqymdy saıası jáne ekonomıkalyq reformalar jóninde birqatar málimet berdi.
Rım Papasy kezdesýge múmkindik bergeni úshin Prezıdentke rızashylyǵyn bildirip, Qazaqstanǵa resmı saparmen keletinin, Álemdik jáne dástúrli dinder kóshbasshylarynyń VII sezine qatysatynyn rastady. Sondaı-aq óziniń Qazaqstanǵa sapary men aldaǵy ýaqytta ótetin forýmnan úlken úmit kútetinin jetkizdi.
«Men dinaralyq dıalogty, memleketterdiń birligi men jaqyndasýyn ilgeriletý turǵysynan osy keleli jıyndy taǵatsyzdana kútemin. Munyń qazirgi ýaqytta máni óte zor», dedi Katolık shirkeýiniń basshysy.
Pontıfık qazirgi kúrdeli geosaıası jaǵdaı kezinde álemde birlik pen kelisimge qol jetkizý asa mańyzdy ekenin jetkizdi.
«Sizdiń elińizdiń qanshalyqty áralýan jáne tutas ekenin kórip otyrmyz. Bul – turaqtylyqtyń negizi. Qazaqstanda buǵan túsinistikpen qaraıtynyna qýanyshtymyz. Meniń qoldaýyma senýińizge bolady. Sizdiń kúsh-jigerińizdi baǵalaımyn», dedi Rım Papasy.
Kelissóz sońynda Qasym-Jomart Toqaev Qazaqstannyń Qasıetti Taqpen rýhanı kelisim jáne ózara qurmet kórsetý salasyndaǵy yntymaqtastyqty odan ári damytýǵa beıildi ekenin naqtylady.