Urlyqshy saqtaý kamerasynyń uıashyǵyna kiltti sáıkestendirip alǵan, dep habarlaıdy Egemen.kz Nur-Sultan qalasynyń Polısııa departamenti taratqan aqparatqa silteme jasap.
«Kúndizgi ýaqytta «Magným» sýpermarketinde bolǵan áıel, saqtaý kamerasynyń janyndaǵy satyp alýshylardyń kóptigin paıdalanyp, bos uıashyqtyń kiltin alyp, basqa uıashyqty ashyp alǵan. Ol alyp shyqqan sómkede quny 450 myń teńge turatyn «Aıfon 12» telefony bolǵan. Beınebaqylaý kameralarynyń kómegimen polısııa qyzmetkerleri urlyq jasaǵan kúdiktini ustaǵan. Ol 39 jastaǵy elorda turǵyny bolyp shyqty», delingen habarlamada.
Atalǵan fakti boıynsha «urlyq» baby boıynsha sotqa deıingi tergeý amaldary júrgizilip jatyr. Zattaı dáleldemeler tárkilendi, kúdikti moıyndaý kórsetpelerin berdi. Astana aýmaǵynda buryn jasalǵan uqsas qylmystarǵa qatystylyǵy tekserilýde.