Dúnıejúzilik densaýlyq saqtaý uıymy «Omıkron» shtamynyń jańa túrine alańdaýshylyq bildirdi, dep habarlaıdy Egemen.kz Deutsche Welle basylymyna silteme jasap.
Basylymnyń málimetinshe, uıym «Omıkron» shtamynyń eki jańa túrin baqylap jatyr. Dúnıejúzilik densaýlyq saqtaý uıymy BA.4 jáne BA.5 shtamdarynyń juqpaly ekenin anyqtaý úshin baǵalaý tizimine qosqanyn aıtqan.
«DDU qosymsha mýtasııalarǵa baılanysty jańa kishi túrlerdi baqylaýdy bastady, olardyń ımmýndyq qorǵanys áleýetine áserin túsiný úshin qosymsha zertteý qajet», delingen habarlamada.
Sonymen qatar DDU basshysy Tedros Adhanom Gebreııýs álemde COVID-19 pandemııasynyń áli aıaqtalmaǵanyn aıtty. Ol sońǵy aptada COVID-19-dan ólim sany azaıyp jatqanyn, biraq vırýs óte juqpaly ekenin, damýyn jalǵastyryp jatqanyn málimdegen. «COVID-19 pandemııasy áli aıaqtalǵan joq. Ol juǵýyn toqtatpaǵansha pandemııa esh jerde aıaqtalmaıdy», dedi T. Gebreııýs.Sonymen qatar koronavırýsqa qarsy shekteýlerdiń jeńildetilýine baılanysty ınfeksııa tezirek taralýy múmkin, bul óz kezeginde jańa shtamdardyń paıda bolýyna ákelýi múmkin.
«Vaksına ómirdi saqtap qalýdyń eń kúshti quraly bolyp qala beredi», dedi DDU basshysy.
Aıana Toǵanbek