Naýryzdaǵy Ulttyq biryńǵaı testileýge barlyǵy 105 myńǵa jýyq adam qatysqan. Olardyń ishinde túlekterdiń 78,2%-y qazaq tilinde, 21,7%-y orys tilinde, 0,2%-y aǵylshyn tilinde testileýden ótti. 72 talapker 130-dan joǵary ball jınady. Bul týraly Bilim jáne ǵylym mınıstrligi habarlady.
Naýryzdaǵy testileýde talapkerlerdiń 70%-dan kóbi shekti ball jınady. Bul byltyrǵymen salystyrǵanda 6%-ǵa artyq. Al ortasha ball shamamen 69 baldy qurady. Eń joǵary ball – 135.
«Naýryzdaǵy UBT suraqtarynyń formaty men sany ózgerissiz qaldy. Biraq biz úmitkerlerge birneshe qosymsha qyzmetti qostyq. Olardyń eń mańyzdysy – jeke taqyryptyq taldaý. Endi túlek testileýdi aıaqtaǵannan keıin jınaǵan upaı sany týraly ǵana aqparat alyp qoımaı, sonymen birge qandaı taqyryptardy biletini, qaısysyn tolyq bilmeıtini týraly qosymsha taldaýlar alady. Bul oqýshyǵa jeke taqyryptarǵa kóbirek ýaqyt bólýge jáne qatelermen jumys isteýge múmkindik beredi. Taǵy bir qyzmet – IT baǵyttaryna túsetinder úshin «Matematıka-Informatıka» kombınasııasyn tańdaý. Fızıka bıyl negizgi pán bolyp qalatynyna jáne jańashyldyqtyń ózi 2022-2023 oqý jylynda engiziletinine qaramastan, naýryzdaǵy testileý kezinde bul kombınasııany 800-ge jýyq adam tańdady. Sonymen qatar biz metaldardyń belsendilerin qosý arqyly paıdalanýǵa ruqsat etilgen tuzdyń erigishtigi kestesin jańarttyq. Bul jańalyqtyń barlyǵy test tapsyrýshylardyń pikirlerin eskere otyryp, sondaı-aq negizgi UBT-ǵa daıyndyq sapasyn arttyrý maqsatynda engizildi», dedi Ulttyq testileý ortalyǵynyń dırektory Rýslan Emelbaev.
Mınıstrliktiń málimdeýinshe, naýryzdaǵy UBT-ǵa erekshe bilim berý qajettiligi bar 211 bala qatysty. Byltyr osy kezeńde kórý, estý, tirek-qımyl apparaty qyzmeti buzylǵan 35 talapker testileýden ótken bolatyn. Aıta keteıik, bıyl alǵash ret erekshe qajettiligi bar túlekterge testileý tapsyrmalaryn oryndaý úshin negizgi 240 mınýttan bólek, taǵy 40 qosymsha mınýt berildi.
Byltyr qańtar aıynda ótken UBT-men salystyrǵanda tyıym salynǵan zattardy alyp kirý áreketteri de azaıǵan. Smartfondardy, paraqtardy jáne basqa da tyıym salynǵan zattardy alyp kirgisi kelgen 99 úmitker test tapsyrý múmkindiginen aıyryldy.
UBT-ǵa kirý úsh deńgeıli júıe boıynsha júzege asyrylady: Face ID tulǵany sáıkestendirý arqyly, jeke kýálik jáne otyrǵan adamnyń jeke basyn anyqtaý. Bıyl testileý «bir kompıýter – eki kamera – bir testileýshi» qaǵıdasy boıynsha júrgizilip jatyr. Testileý kezinde ereje buzǵany úshin 259 adam aýdıtorııadan shyǵarylyp, nátıje joıyldy.