Jambyl oblysynda turatyn kelinshek óziniń artynan kelgen jasaýyn burynǵy kúıeýinen alyp berýdi ótinip, sotqa júgingen, dep habarlaıdy Egemen.kz óńirlik sottyń resmı saıtyna silteme jasap.
Sottyń málimetinshe, 2021 jylǵy maýsym aıynda boıjetken jaýapkermen musylmansha neke qıdyrǵan. Toıdan keıin qalyńdyqtyń tórkini jasaý ákelgen. Alaıda arada kelispeýshilikter bolyp, keıin erli-zaıypty ajyrasyp ketken. Degenmen er adamnyń týystary qyz jasaýyn qaıtarýdan bas tartqan. Osydan keıin kelinshek jasaýdy qaıtarý úshin Turar Rysqulov aýdanynyń sotyna júgingen.
Isti qaraý barysynda taraptar daýdy bitimgerlik jolmen sheshý týraly kelisimge kelgen. Onyń sharttaryna sáıkes, jaýapkerler 2022 jyldyń 14 sáýirine deıin aryzdanýshyǵa tizimge sáıkes qyz jasaýyn óz erkimen qaıtarýǵa mindetteldi. Al kelinshek belgilengen merzimde múlikti ózi tıep, áketýge mindetti.
Medıasııalyq kelisimdi bekitý týraly sot uıǵarymy zańdy kúshine endi.