Prezıdenttik Jastar kadrlyq rezerviniń músheleri volonterlik bastama retinde Jambyl oblysynyń Shý qalasynda ústel tennısinen respýblıkalyq týrnır uıymdastyryp, Balalar jylyna arnalǵan jasóspirimder arasynda basketboldan ashyq aýdandyq týrnır ótkizdi, dep habarlaıdy Egemen.kz AQDM baspasóz qyzmetine silteme jasap.
Is-sharaǵa Aqparat jáne qoǵamdyq damý vıse-mınıstri Aleksandr Danılov qatysyp, óskeleń urpaqtyń básekege qabilettilik rýhyn qalyptastyrý men nyǵaıtýdyń, onyń ishinde dene shynyqtyrý jáne sportqa baýlýdyń mańyzdylyǵyna toqtaldy. Mundaı is-sharalardy júzege asyrý úshin memleket, bıznes jáne qoǵamdyq sektor sınergııasynyń qajettigi erekshe ataldy.
Sport jarystarynda Qazaqstannyń ár óńirinen kelgen 150-den astam balalar men jasóspirimder óz sheberlikterin kórsetti, jeńimpazdarǵa medaldar, gramotalar jáne estelik syılyqtar tabystaldy.
Týrnırdi uıymdastyrýshy, Prezıdenttik Jastar kadrlyq rezerviniń múshesi Maqsat Djatabaev bul epıdemıologııalyq shekteýlerge baılanysty eki jyldyq úzilisten keıin Balalar jyly aıasynda ótken alǵashqy respýblıkalyq sporttyq is-sharalardyń biri ekenin aıta kelip, eldegi balalar sportyn tek memleket tarapynan ǵana emes, sonymen qatar, azamattyq jáne kásipkerlik qoǵamdastyqtar, bastamashyl toptar tarapynan da odan ári qoldaýǵa senim bildirdi.