QR IIM Esirtki qylmysyna qarsy is-qımyl departamenti qyzylordalyq áriptesterimen birlesip sıntetıka óndiretin esirtki zerthanasyn anyqtady, dep habarlaıdy Egemen.kz.
QR IIM baspasóz qyzmetiniń habarlaýynsha, jedel aqparatty tekserý barysynda qylmystyq óndiriste kúdikti bolǵan jergilikti turǵynǵa baqylaý júrgizile bastaǵan. Bul ony turmystyq hımııa qaptamasyna jasyrylǵan, ishinde sıntetıkalyq esirtkisi men suıyqtyǵy bar sálemdemeni alyp jatqan jerinen ustaýǵa múmkindik berdi.
«Kúdiktiniń páterin tintý kezinde esirtkini óndirý faktisin dáleldeıtin esirtki zattarynyń qaldyqtary bar ydys-aıaq, elektrondy tarazylar, boıaǵyshtar, jeke qorǵanys quraldary tabyldy. Onyń telefonynyń ishindegi aqparatty zerttegennen keıin polısııa qyzmetkerleri esirtki jasyrylǵan 13 jerdi anyqtady. Ishinde sıntetıkalyq esirtikisi bar 21 túıir tárkilendi», deıdi QR IIM Esirtki qylmysyna qarsy is-qımyl departamenti bastyǵynyń mindetin atqarýshy Asqar Muhametqalıev.
Ol bul esirtkilerdi messendjerler arqyly satqan, tólemdi aqsha aǵyndaryn baqylaý qıyn bolý úshin krıptovalıýtamen alyp otyrǵan.