Qaraǵandyda erekshe bala tárbıelep otyrǵan ata-analar oblys ákimi Jeńis Qasymbekpen kezdesip, densaýlyǵy boıynsha múmkindigi shekteýli balalardyń bilim alý, medısınalyq kómek kórsetý, mádenıet mekemelerine barý, dene shynyqtyrý jáne sportpen shuǵyldanýy máselelerin kóterdi, dep habarlaıdy Egemen.kz.
Aldyńǵy kezdesýde ata-analardan kelip túsken máseleler boıynsha óńir basshysy birqatar tapsyrma bergen bolatyn. Osy ýaqytqa deıin atqarylǵan jumystar jaıly vedomstvo basshylary baıandady.
«Ata-analardyń ótinishi boıynsha saýalnama ázirlendi, ol Google júıesi arqyly eki tilde ózektendirildi. Saýalnama nátıjeleri taldandy. Ata-analarmen kezdesýde qorytyndy jasalyp, bilim berý uıymdarynyń basshylaryna tıisti tapsyrmalar berildi. Mamyr aıynda barlyq problemalyq aımaqtar boıynsha qaıta saýalnama júrgiziledi», dedi Bilim basqarmasynyń basshysy Gúlsim Qojahmetova.
Sondaı-aq aýtızmi bar balalarǵa arnalǵan ortalyq óz jumysyn 1 qyrkúıekte bastaıdy. Qaraǵandyda taǵy bir Psıhologııalyq-medısınalyq-pedagogıkalyq konsýltasııanyń ashylýy balalarda dertti erte anyqtaýǵa múmkindik berdi. Kolledjderde oqýyn jalǵastyra almaıtyn túlekter úshin onynshy óndiristik synyptar ashyldy. Onda jabdyqtar jańartyldy. Sondaı-aq agrarlyq, tigin jáne slesarlyq oqytý úshin qajettiniń bári satyp alyndy.
«О́ńirde erekshe balalarmen jumys isteý úshin mamandar daıarlaý jalǵasýda. Mamyr aıynda 600-den astam muǵalim men 60 ata-ana qosymsha oqýdan ótedi. Reseı akademııasynyń beıimdelgen dene shynyqtyrý boıynsha onlaın kýrstary bastalady. Olarǵa 10 jattyqtyrýshy qatysady. Nátıjesinde aýtızmi bar taǵy 80 bala júzýdi úırenýge múmkindik alady», dedi Bilim basqarmasynyń basshysy.
Al Mádenıet basqarmasy jyl saıyn erekshe qajettilikteri bar balalardyń kirýine óz mekemelerin beıimdeýge tyrysady. Bıyl Sańyraýlar mádenıet úıi men úsh murajaı – Qaraǵandy tarıhı-ólketaný, Balqash jáne Qarqaraly murajaılary beıimdeledi. О́tken kezdesýde ata-analar Ońaltý ortalyqtary týraly aqparattyń joqtyǵyna shaǵymdandy. Densaýlyq saqtaý basqarmasynyń ókili qazir barlyq málimetter qoljetimdi ekenin aıtty.
Sondaı-aq Nur-Sultandaǵy balalardy ońaltýdyń Ulttyq ortalyǵyna kezek boıynsha aqparat ornalastyryldy. Invataksı qyzmetterin paıdalana alatyn tulǵalar tizimi keńeıtildi. Qaraǵandyda jaqyn arada arnaıy kólik aýtızmi bar balalarǵa da qoljetimdi bolady. Jeńis Qasymbek mundaı keńesterdi turaqty túrde ótkizip, jaýapty tulǵalar men vedomstvolardan erekshe balalardyń ata-analarynda týyndaıtyn máselelerdi sheshýdi talap etetinin jetkizdi.