Qazaqstannyń birinshi, álemniń 19-raketkasy Elena Rybakına Shtýtgart (Germanııa) WTA 500 týrnıriniń ekinshi aınalymyna shyqty, dep habarlaıdy Egemen.kz QTF baspasóz qyzmetine silteme jasap.
Rybakına alǵashqy aınalymda dúnıejúzilik reıtıngide 224-orynda turǵan, jarysqa arnaıy shaqyrtý alǵan germanııalyq Nastasıa-Marıana Shýnkpen sheberlik baıqasty. Qarsylastar buǵan deıin kezdespegen edi. О́tken aptada elordada Qazaqstan – Germanııa matchynda Laýra Zıgemýnd pen Anjelıka Kerberdi utqan Elena bul joly da olardyń otandasyna tap boldy. Birinshi partııada 19 jastaǵy nemis sportshysy 4:2 esebimen alǵa shyqqanymen, qazaqstandyq tennısshi tarazy basyn teńestirdi. Taı-breıkte E.Rybakına basymdyq tanytty – 7:6 (7:3). Ekinshi setti Elena breıkpen bastady – 2:0. Alaıda matchqa dop bergende, Shýnk breık jasap ketti – 5:5. Degenmen Rybakına sol boıda qaıtadan breıkke qol jetkizdi – 6:5. Sodan keıin múmkindigin múlt jibergen joq – 7:5.Eki saǵattan astam ýaqytqa sozylǵan tartysty básekede qazaqstandyq tennısshi 3 eıspen birge 9 breık-poınttyń úsheýin paıdalandy. Qarsylasy 3 eıs, 2 breıkpen (9 breık-poınt) kózge tústi. Rybakına júlde qory 703 580 AQSh dollaryna baǵalanǵan dodanyń shırek fınalyna shyǵý úshin álemniń 3-raketkasy, ıspanııalyq Paýla Badosamen tartysqa túsedi.