Memleket basshysy Qasym-Jomart Toqaev Amanat partııasynyń atqarýshy hatshysy Ashat Oralovty qabyldady, dep habarlaıdy Egemen.kz Aqordanyń resmı saıtyna silteme jasap.
Kezdesý barysynda Prezıdentke kezekten tys ótken XXII Sezde partııany jańǵyrtý jóninde bergen tapsyrmalarynyń oryndalýy jóninde maǵlumat berildi.
Ashat Oralov partııa Tóraǵasyna Almaty, Shymkent qalalaryndaǵy, Túrkistan jáne Shyǵys Qazaqstan oblystaryndaǵy jurtshylyqpen kezdesýlerdiń nátıjeleri, sondaı-aq qoǵamdyq qabyldaýlardyń jumystary jóninde baıandady. Naýryz aıynan beri Respýblıkalyq mobıldi qoǵamdyq qabyldaý toby 6 óńirde, atap aıtqanda Aqmola, Qaraǵandy, Pavlodar, Qyzylorda, Soltústik Qazaqstan jáne Túrkistan oblystarynda turǵyndarmen kezdesýler ótkizdi. Maýsym aıynyń sońyna deıin eldiń barlyq óńirinde qabyldaýlardy jalǵastyrý josparlanyp otyr.
Budan bólek Amanat partııasynyń atqarýshy hatshysy negizgi baǵdarlamalyq qujattardy, partııa janyndaǵy qoǵamdyq keńesterdiń qyzmetin, jergilikti jerlerde saılaýaldy baǵdarlamanyń oryndalýyn tekserýdi, bastaýysh partııa uıymdarynyń jumysyn jandandyrý, sondaı-aq «Ashyq partııa» tujyrymdamasy aıasynda «Talqylau» dıalog alańynyń iske qosylǵany jóninde baıandady.
Prezıdent halyqpen keri baılanys jasaý isin kúsheıtý, aımaqtarda depýtattyq fraksııalardyń tıimdiligin arttyrý jáne partııanyń jastar qanatyn jańǵyrtý qajettigine basa mán berdi.
Memleket basshysy azamattardy tolǵandyrǵan máselelerdi sheshý úshin Amanat partııasynda barlyq qajetti resýrs bar ekenin atap ótti. Prezıdenttiń pikirinshe, partııanyń aımaqtyq fılıaldary osy máselede negizgi ról atqarýǵa tıis jáne óz deńgeıinde mazmundy qoǵamdyq dıalogty nyǵaıtýy qajet.