Nur-Sultan qalasynyń qorshaǵan ortany qorǵaý jáne tabıǵatty paıdalaný basqarmasy jyl saıynǵy masamen kúres jumystaryn bastady. Dezınseksııa kezinde saqtyq sharalaryn ustaný kerek, dep habarlaıdy Egemen.kz qala ákimdigine silteme jasap.
«Astanalyq dezınfeksııa» JShS-men birlesip, osymen úshinshi maýsymda masalardy joıý jumysyn júrgizemiz. Bul shara olardy azaıtýǵa baǵyttalǵan. Dezınseksııalyq jumystardy júrgizýge 150 adam jumyldyrylady, olar arnaıy rotorlarmen jaraqtandyrylady. Sondaı-aq, sý aıdyndarynda da, qalanyń ishki kvartaldyq aýmaqtarynda da óńdeý jumystaryn júrgizetin arnaıy tehnıka iske qosylady. Qyzmetkerler tolyǵymen nusqaýlyqtan jáne kásibı daıarlyqtan ótti. Dezınseksııalyq jumystar kezinde paıdalanylatyn preparattar qoldanýǵa ruqsat etilgen tizilimge engizilgen jáne SES-pen kelisilgen», deıdi Nur-Sultan qalasy Qorshaǵan ortany qorǵaý jáne tabıǵatty paıdalaný basqarmasy basshysynyń orynbasary Janar Elýanqyzy.
Birinshi kezekte bıologtar, entomologtar sý aıdyndarynda dernásilderdiń bolýyn tekseredi. Eger olar tabylsa, masalardyń jappaı kóbeıýin boldyrmaý úshin rotorly búrikkishterdiń kómegimen nemese dezqurylǵysy bar arnaıy mashınalarmen óńdeledi. Osydan keıin óńdeý jumysy qalanyń ishki kvartaldarynda jalǵasady.
Qalada is-sharalar túngi ýaqytta - saǵat 21:00 - 04.00 aralyǵynda ótkiziledi. Dezınseksııalyq jumystar úshin quramynda hlorpırıfos jáne malatıon áser etýshi zaty bar adamdar men janýarlarǵa qaýiptiligi az preparattar qoldanylady. Degenmen, dezınseksııa jumystary kezinde saqtyq sharalaryn ustaný kerek. Atap aıtqanda, óńdelgen jerlerge barmaý jáne óńdeý kezinde terezelerdi jabý qajet.