Ishki ister mınıstri Marat Ahmetjanov «Jas búrkit» sporttyq áskerı-patrıottyq klýbynyń eń jas múshesine óziniń jeke qol saǵatyn syıǵa tartty, dep habarlaıdy Egemen.kz.
M.Ahmetjanov Ulttyq ulannyń Shymkent qalasyndaǵy 6506 áskerı bóliminde boldy. QR Ulttyq ulannyń baspasóz qyzmetinen málim etkendeı, «Jas búrkit» sporttyq áskerı-patrıottyq klýby atalǵan bólim janynan jasaqtalǵan. Mınıstr klýb qyrandarymen tanysyp, olardyń birine aıryqsha syılyq jasady. Ol eń jas patrıotqa óziniń jeke qol saǵatyn syıǵa tartty.
Ishki ister mınıstri óńirge sapary barysynda 6506 áskerı bóliminiń materıaldyq-tehnıkalyq bazasyn, qyzmettik ınfraqurylymyn jáne oqý-jattyǵý obektileriniń jaǵdaıymen tanysty.
Sonymen qatar, 6506 áskerı bóliminiń tarıhynan syr shertetin, batyrlardyń erligin nasıhattaıtyn murajaıdyń kórmesin aralady.
«Ishki ister organdary úshin de, Ulttyq ulan bólimsheleri úshin de qańtardaǵy oqıǵalar kúrdeli synaq boldy. Quqyq qorǵaý organdarynyń qyzmetkerleri men Ulttyq ulan áskerı qyzmetshileri qıyn kúnderde aldyńǵy shepte konstıtýsııalyq qurylym men el tynyshtyǵyn qorǵady. Memleket basshysy áskerılerdiń jaýyngerlik daıyndyǵyna, quqyq qorǵaý salasy qyzmetkerleriniń jaýyngerlik daıyndyǵyna aıryqsha mán berip otyr», dedi IIM basshysy Marat Ahmetjanov.