Taıaýda Vesti.kz saıty aralas jekpe-jek álemindegi eń beldi promoýshen – UFC-ge baılanysty birneshe qyzyqty málimetti jarııa etti. Bul joly olar jartylaı orta salmaqta kúsh synasyp júrgen «TOP-15» sportshyǵa keńinen toqtalyp, kimniń qandaı eleýli tabystarǵa qol jetkizgeni týraly tartymdy aqparat taratty.
35 jastaǵy Argentınanyń arlany Santıago Ponzınıbbıo 77 kılo salmaq dárejesindegi eń myqty nokaýter dep tanyldy. Ol 33 kezdesýiniń 28-in merziminen buryn aıaqtaǵan eken. Ekinshi jáne úshinshi oryndarda – brazılııalyq Vısente Lýke men amerıkalyq Horhe Masvıdal. Alǵashqysy 19 (30 kezdesý), ekinshisi 18 (51 kezdesý) qarsylasyn esinen tandyrdy. Tórtinshi satyǵa 15 ret (15 kezdesý) aıqyn jeńiske qol jetkizgen Shavqat Rahmonov jaıǵasty. Osy oraıda, qazaq sportshysy joǵaryda esimderi atalǵandardan áldeqaıda az báseke ótkizgenin eskergen jón. Jáne de Shavqat óz jekpe-jekteriniń barlyǵynda jeńiske jetti. Al Ponzınıbbıo (5 ret), Lýke (8 ret) men Horhe Masvıdaldiń (16 ret) bir emes, birneshe ret jeńilistiń kermek dámin tatqanyn kózimiz kórdi. Osy jaǵynan alsaq, qandasymyzdyń ózgelerden kóshilgeri ekeni esh daý týǵyzbaıdy. О́ıtkeni Rahmonov 100 paıyzdyq kórsetkishke qol jetkizip otyr. Sondaı-aq úzdikter tiziminde Gılbert Berns (25 kezdesý, 20 jeńis, 15 nokaýt), Lı Djınglıang (25-18-16), Maıkl Keza (24-18-11), Hamzat Chımaev (11-11-10), Djeff Nıl (18-14-11) jáne Kamarý Ýsman (21-20-10) syndy sańlaqtar bar.
Qarsylastaryn esinen tandyrǵan soıqan soqqyly sportshylardyń reıtınginde Shavqat Rahmonov jetinshi orynda nyq tur. Báseke barysynda ol segiz qarsylasyn sulatyp salyp, aýyr nokaýtqa jiberdi. Ázirge Horhe Masvıdal (16 nokaýt), Santıago Ponzınıbbıo (15), Vısente Lıýke (11), Lı Djınglıang (9), Kamarý Ýsman (9) jáne Djeff Nıl (8) ǵana jerlesimizden ozyp tur.
Sabmıshn, ıaǵnı «qylqyndyrý» nemese «aýyrtý» tásili arqyly jeńiske jetken jampozdardyń tiziminde Shavqat úzdik bestikti túıindeýde. Ol jeti jekpe-jeginde joǵaryda aıtylǵan ádisterdi qoldanyp, qarsy kelgenderdi tyrp etkizbeı utty. Kúres óneriniń tásilin eń keremet qoldanyp júrgender qatarynda Maıkl Keza (11 sabmıshn), Kamarý Ýsman (8), Gılbert Berns (8) jáne Vısente Lýke (8) bar.
UFC-degi jartylaı orta salmaq dárejesiniń jalpy reıtınginde Alashtyń maqtan tutar azamaty ázirge 15-oryndy ıelenýde. Bul – qazaqstandyq jekpe-jek sheberleri arasyndaǵy eń úzdik kórsetkish. Osy salmaqtyń teńdessizi – 35 jastaǵy Kamarý Ýsman. Ol AQSh-ta týyp-óskenimen, áke-sheshesi Nıgerııadan qonys aýdaryp kelgen. Chempıondyq belbeý dál Ýsmanǵa tıesili. Ony 34 jastaǵy Kalıfornııa shtatynyń týmasyn Kolbı Kovıngton ókshelep keledi. Kovıngton reıtıngte birinshi oryndy ıelenýde. Ekinshi jáne úshinshi satylarǵa ulybrıtanııalyq Leon Edvards pen shvesııalyq Hamzat Chımaev jaıǵasty. Odan keıingi oryndarda brazılııalyq Gılbert Berns pen amerıkalyq Vısente Lýke. 6-12 oryndardyń barlyǵyna tegisteı AQSh faıterleri turaqtady. Olar – Belal Mýhammad, Stıven Tompson, Horhe Masvıdal, Shon Breıdı, Nıl Megnı, Maıkl Keza jáne Djeff Nıl. Sondaı-aq qytaılyq Lı Djınglıang pen argentınalyq Santıago Ponzınıbbıo úzdik 15 sportshynyń sanatynda.