Sport jańalyqtary

Tosyn nátıjeler tirkeldi

Fýtboldan Qazaqstan Premer-lıgasynyń jetinshi týrynyń birneshe matchynda tosyn nátıjeler tirkeldi.

 «Astana» óz alańynda top basyndaǵy «Kaspııdiń» qaqpasyna jaýapsyz tórt dop saldy – 4:0. «Atyraý» «Tobyldy» qabyldady. Birinshi kezeńde esep ashylǵan joq. Úzilisten soń Andrııa Fılıpovıch dýbldiń avtory atansa, qostanaılyqtar sapynan Igor Sergeev mergendik tanytty – 2:1. Kelesi kúni «Ordabasy» men «Qyzyljar» arasynda ótken kezdesýde 3:1 esebi tirkeldi. «Qaırat» Almatyda «Turannan» jeńildi – 0:1. Osylaısha, túrkistandyqtar osy chempıo­nattaǵy alǵashqy golyn soǵyp, alǵashqy je­ńisine qol jetkizdi. Al «Qaırat» birinshi ret sú­rinip, jeke-dara kósh bastaý múmkindiginen aıy­ryldy. О́zge matchtarda mynadaı esepter tir­keldi: «Shahter» – «Aqjaıyq» 0:1, «Aq­tóbe» – «Maqtaaral» 1:0, «Aqsý» – «Taraz» 1:2.

Jeti týrdan keıin 13 upaıy bar «As­tana» men «Kaspıı» kósh bastap keledi. Olardan bir upaıy kem «Qaırat» úshinshi oryndy qanaǵat tutýda. Kósh sońynda – «Maq­taaral» men «Aqsý». Olar tórt upaıdan enshileýde.

«Kanelo» GGG-dan ozdy

Áıgili Boxrec.com saıty álemdegi eń úzdik kásipqoı boksshylardyń reı­tın­gin jarııalady. Jańartylǵan tiziminde Saýl Alvares kósh bastap tur.

Jýyrda ǵana jartylaı aýyr salmaqqa aýysqan 31 jastaǵy Meksıkanyń maqtanyshy sharshy alańda 60 kezdesý ótkizip, sonyń 57-sinde jeńis toıyn toılady. Ol tek bir ret qana jeńildi. 39 básekeni merziminen buryn aıaqtady. Tarqatyp aıtsaq, 2013 jyly Kanelo amerıkalyq Floıd Meıvezerge upaı sanymen utyldy. 2016 jyly óziniń otandasy Horhe Iаres jáne 2017 jyly qazaqstandyq Gennadıı Golovkınmen teń tústi. Dál sol jerlesimiz úzdikter reıtınginde ekinshi oryndy ıelenýde. Taıaýda ǵana 40 jasqa tolǵan GGG 44 márte rıngke kóterilip, 42 ret basymdyq tanytty. 37 qarsylasyn uryp jyqty. Bir ret utylyp, bir kezdesý teń aıaqtaldy. Úshinshi orynda – Terens Kroýford. 34 jastaǵy AQSh-tyń arlany 38 jekpe-jektiń barlyǵyn sátti aıaqtap, 29 básekede nokaýt tirkeldi.

Sondaı-aq «TOP-10» boksshynyń qata­rynda Taıson Fıýrı (Ulybrıtanııa), Eroll Spens (AQSh), Aleksandr Ýsık (Ýkraı­na), Entonı Djoshýa (Ulybrıtanııa), Deonteı Ýaıdler (AQSh), Kallým Smıt (Ulybrıtanııa) jáne Artýr Beterbıev (Reseı) syndy sań­laqtar bar.

Sheshýshi tusta súrindi

Qazaqstandyq tennısshi Iýlııa Pýtın­seva Túrkııanyń Ystanbul qalasynda ótip jatqan júlde qory 239 477 AQSh dollaryn quraıtyn WTA týrnıriniń fınalyna shyǵa almady.

Atalǵan jarystyń alǵashqy aınalym­darynda danııalyq Magda Lınett pen shve­sııalyq Rebekka Patersondy shań qaptyrǵan jerlesimiz shırek fınalda WTA tiziminde 41-oryndy enshilegen Aýstralııa ókili Aıla Tomlıanovıchti tize búktirdi – 5:7, 6:2, 6:4. Jar­tylaı fınalda Iýlııanyń joly Anastasııa Potapovamen qıysty. Álemdik reıtıngte nebári 122-orynda turǵan 22 jastaǵy Reseı tennısshisiniń buǵan deıin jarq etip kózge túsken kezi esimizde joq. Desek te bul kezdesýde Pýtınseva qatelikke jıi boı aldyryp, 6:2, 2:6, 2:6 esebimen Potapovaǵa jol berdi.

Barselonada A.Býblık úshinshi kezeńge óte almasa, Shtýtgarttaǵy WTA-500 iri týrnı­rinde E.Rybakına da ekinshi qarsylasyna ese jibergen bolatyn. Al Shymkentte ótken TF World Tennis Tour W15 týrnırinde reseılik Anas­tasııa Sýhotınamen jup qurǵan Jibek Qulambaeva bas júldeni oljalady.