Nur-Sultan qalasynyń bank qyzmetkeri tutynýshylardyń atynan nesıe rásimdep, alaıaqtyq jasaǵan, dep habarlaıdy Egemen.kz polisia.kz saıtyna silteme jasap.
28 qańtarda Qaraǵandy qalasy PB-nyń Ońtústik-shyǵys polısııa bólimine 50 jastaǵy qala turǵynynan aryz túsirip, belgisiz bireý onyń atynan 2 mıllıon 100 myń teńge kóleminde nesıe rásimdegenin aıtqan.
Tergeý nátıjesinde jábirlenýshiniń atyna rásimdelgen nesıe Nur-Sultandaǵy bankterdiń birinde berilgen bolyp shyqty. Polıseıler bul qylmysqa aryzdanýshynyń tanystarynyń qatysy bar degen nusqamen jumys isteýge kiristi.
«20 sáýirde jedel-izdestirý is-sharalary barysynda krımınaldyq polısııa qyzmetkerleri 19 jastaǵy elorda turǵynyn ustady. Ol óz kinásin moıyndady. Ustalǵan azamattyń jábirlenýshige nesıe berilgen qarjy mekemesiniń menedjeri ekeni belgili boldy», delingen habarlamada.
Polısııa qyzmetkerleri sotqa deıingi tergeý barysynda kúdiktiniń osyǵan uqsas taǵy 18 qylmysqa qatystylyǵyn anyqtady. Onyń ústine zardap shekkender respýblıkanyń ár óńiriniń turǵyndary bolyp shyqty. Jábirlenýshilerge keltirilgen shyǵynnyń jalpy somasy anyqtalyp jatyr.
Atalǵan fakti boıynsha Qylmystyq kodekstiń 190-baby («Alaıaqtyq») boıynsha qylmystyq is qozǵaldy.
Aıana Toǵanbek