Menshik ıesi – halyq

«Jerdiń jáne tabıǵı resýrs­tardyń ıesi halyq» degen nor­many Konstıtýsııada birjola bekitýdiń saıası máni zor bolmaq jáne bolashaqta bul máseleni ártúrli túsindirýge jol berilmeýi kerek. Osy­ǵan baılanysty, Negizgi Zań­nyń 6-babyn mynadaı redaksııada berý usynylady:

«Jer jáne onyń qoınaýy, sý, ósimdikter jáne janýarlar álemi, basqa da tabıǵı resýrstar halyqqa tıesili. Memleket halyq atynan menshik ıeligin júrgizýge quqyly», degen Prezıdent sózin tolyq maquldaımyn. О́ıtkeni jer rasynda da halyqtyń ıgiligi ekeni ras.

«Konstıtýsııada halyqtyń jer men tabıǵı resýrstardyń menshik ıesi ekendigi týraly normanyń túpkilikti bekitilýi úlken saıası mánge ıe bolady, bolashaqta kez kelgen qarama-qaıshylyqtardy boldyrmaıdy» degen Prezıdent pikiriniń máni de tym tereńde jatyr dep pa­ıymdaımyn.

Negizgi Zańnyń osy babynyń qazirgi erejeleriniń túpki máni «Jer jáne onyń qoınaýy, sý kózderi, ósimdikter men janýar­lar dúnıesi, basqa da tabıǵı resýrstar memleket menshiginde bolady. Jer, sondaı-aq zańda bel­gi­lengen negizderde, sharttar men shekterde jeke menshikte de bolýy múmkin», degen joldarmen naqtylanǵany jón.

Konstıtýsııanyń 6-babynyń redaksııasyn ózgerte otyryp, biz ony «memlekettik bıliktiń birden-bir bastaýy – halyq» degen tujyrymmen túıindep, bılik búkil Qazaqstan halqyna tıesili dep aıtylatyn Konstıtýsııanyń 3-babyna sáıkes keltiremiz.

Jerge qatysty barlyq qaǵı­datty máselelerdi, memlekettiń she­karasy men aýmaqtyq tutas­tyǵy máselelerin Qazaqstan halqy referendýmda sheshýge tıis. Bul ereje meniń oıymsha, Konstıtýsııanyń 6-babyna engizilýge tıis. Qazirgi jer zańnamasyna Qazaqstan Kons­tıtýsııasynyń 6-babynyń jańa erejelerine sáıkes ózgeris­­­ter men tolyqtyrýlar engizgen jón.

Prezıdent jerge qatysty máselelerdi nyq shegelep aıtty. Osy oraıda biz baıtaq dala­myzdyń shynynda da halyq­tyń baǵa jetpes baılyǵy ekenin umytpaýymyz kerek.

Marat SÁRSEMBAEV,

Zańnama jáne quqyqtyq aqparat ınstıtýtynyń bas ǵylymı qyzmetkeri, zań ǵylymdarynyń doktory