Semeıdegi Álıhan Bókeıhan atyndaǵy ýnıversıtette aqparattyq tehnologııalardy damytýǵa baǵyttalǵan Abai IT-Valley, ıaǵnı «Abaı IT alqaby» atty tehnologııalyq klasteriniń qurylýyna baılanysty baspasóz máslıhaty ótti.
Aıta keteıik, tehnologııalyq klaster Álıhan Bókeıhan ýnıversıtetiniń negizinde Sıfrlyq damý, ınnovasııalar jáne aeroǵarysh ónerkásibi mınıstrligi, Astana Hub halyqaralyq IT-startaptar tehnoparki men Ulttyq banktiń «Tólem jáne qarjylyq tehnologııalardy damytý» ortalyǵynyń qoldaýymen qurylyp otyr.
Abai IT-Valley tehnoklasteri óńirdegi IT mamandarynyń basyn qosatyn, ári aldyńǵy qatarly óndiristik-ınnovasııalyq tehnologııalardy ázirleýge jáne júzege asyrýǵa múmkindikter ashatyn tehnologııalyq ortalyq retinde qyzmet atqarady. Tehnoklasterdi tolyǵymen jabdyqtap, bilikti mamandarmen qamtamasyz etken Álıhan Bókeıhan ýnıversıtetiniń basshylyǵy.
Baspasóz máslıhatynda aıtylǵandaı, tehnoklasterdiń resmı ashylý saltanaty mamyr aıyna josparlanǵan. Al qazirgi ýaqytta klaster aıasynda jumys isteýge nıetti mamandar men IT salasy boıynsha bilim alýǵa umtylatyn jastardy bir ortalyqqa jınaý, jumyldyrý jáne oqytý jumystary júrgizilip jatyr.
Keshegi basqosýda ýnıversıtet basshylyǵy tehnoklasterdiń joba menedjeri Ashat Beısembaev, Sıfrlyq damý, ınnovasııalar jáne aeroǵarysh ónerkásibi mınıstrliginiń aqparattyq jáne aqparattyq-kommýnıkasııalyq tehnologııalardy damytý departamentiniń dırektory Darhan Ahmedıev, «Astana Hub halyqaralyq IT-startaptar tehnoparki» korporatıvtik qorynyń bas dırektory Maǵjan Madıev, Ulttyq banktiń «Tólem jáne qarjylyq tehnologııalardy damytý ortalyǵy» AQ basqarma tóraǵasy Bınýr Jalenov usynys-pikirlerin ortaǵa saldy. Spıkerler tehnoklasterdi qurýdaǵy maqsat-mindetterdi jáne klasterdiń jumys baǵyttaryn tanystyrdy.
– Atalǵan jobada jastardyń bilim alýy úshin qajetti jaǵdaıdyń barlyǵy jasalǵan. Bilimge qushtar jastarda tek ynta, jiger bolsa, bolǵany. Aıta keterligi, munda belgili talaptarǵa baılanysty bilikti, bilimdi mamandar jumys isteıdi. Aldymyzǵa qoıǵa josparlar da kóp, – deıdi joba menedjeri Ashat Beısembaev.
Spıkerler, sonymen qatar tehnoklasterdi ne sebepti Abaı esimimen ataǵandaryn túsindirdi. Aıtýlarynsha, klaster hakim Abaıdyń týǵan jerinde ashylyp otyr, onyń ústine klasterdiń qurylý merzimi Prezıdent Qasym-Jomart Toqaevtyń Abaı oblysyn qurý týraly sheshimimen tuspa-tus kelgen. Álbette, Abaı tulǵasy qashanda bilim jáne ǵylymmen, aǵartýǵa, jańalyqqa umtylýmen baılanysty bolǵandyqtan, ortalyqty Abaı esimimen ataý jóninde sheshim qabyldanǵan.
Baspasóz máslıhatyna buqaralyq aqparat quraldarynyń ókilderi jáne shaqyrylǵan qonaqtarmen qatar, Semeı qalasynyń joǵarǵy, orta-kásiptik oqý oryndarynyń júzdegen stýdentteri qatysty. Jaqyn arada stýdentterge Astana Hub tehnoparkimen birlesken tegin IT kýrstary ótkiziledi. Qysqa jáne orta merzimdi oqý kýrstarynda jastar zamanaýı baǵdarlamalaý tilderin, sonymen qatar IT-startaptardy ázirleý, júzege asyrý jáne alǵa jyljytý joldaryn úırenedi. Alǵashqy kýrsqa qazirdiń ózinde 100 adam jazyldy.
Aldaǵy ýaqytta Abai IT-Valley tehnologııalyq klasteriniń negizinde arnaıy korporatıvti qor qurylyp, zamanaýı IT jobalardy qarjylandyratyn ınvestısııa kózderi tartylmaq. Bul klaster negizindegi oqytý kýrstarynda bilim alǵan jastarǵa óz bilimderin is júzine asyryp, IT-startaptaryn iske asyrýǵa múmkindikter ashady.