Oral qalasynda koronavırýstan emdeıtin 200 tósektik modýldik stasıonar jabyldy, dep habarlaıdy Egemen.kz.
BQO densaýlyq saqtaý basqarmasy málim etkenindeı, osyǵan deıin onda jatqan jalǵyz naýqas oblystyq juqpaly aýrýlar aýrýhanasyna aýystyryldy. Onyń jaǵdaıy áli de aýyr.
«Modýldik stasıonar jabylǵanymen, dárigerler kerek bolǵan jaǵdaıda jumysqa kirisýge daıyn. Qytaıda indet qaıta órship jatqandyqtan, koronavırýstyń taralý qaýpi saqtalyp otyr», dep habarlady vedomstvodan.
Basqarmadan túsken málimetke qaraǵanda, vaksınasııa bastalǵannan beri oblysta 276 013 adam birinshi komponentti saldyrdy. Bul – egilýge tıisti turǵyndardyń 67 paıyzy. Sondaı-aq 267 525-i (65 paıyzy) ekinshi komponentpen de egildi. О́ńirde 79 202 adam revaksınasııadan ótti.
Pfizer kompanııasynyń vaksınasyn 11 468 adam alsa, sonyń 428-i – júkti, 5080-i – bala emizetin áıelder, 5944-i – jasóspirimder, 16-sy – múgedekter.