Nur-Sultan qalasynyń ákimi Altaı Kólginov Instagram paraqshasynda bıyl jańadan abattandyrylǵan aýlalar men qoǵamdyq keńistikterdiń sany aıtarlyqtaı artatynyn málim etti, dep habarlaıdy Egemen.kz.
«Abattandyrylǵan qoǵamdyq keńistikter bos ýaqytty taza aýada ári densaýlyqqa paıdaly kúıde ótkizip qana qoımaı, jastardyń áleýetin ashýyna da, ony iske asyrýyna da septigin tıgizedi. Sebebi osyndaı ashyq keńistikterde shyǵarmashylyq keshter ótkizý úshin arnaıy túrde sahnalar men alańdar ornatamyz.
Bıyl jańadan abattandyrylǵan aýlalar men qoǵamdyq keńistikterdiń (saıabaqtar, gúlzarlar, jelekjoldar) sanyn aıtarlyqtaı arttyramyz. Taǵy 200-den astam aýmaqty abattandyrýdy josparlap otyrmyz, olar jurtshylyq úshin mindetti túrde tartymdy oryndardyń birine aınalady.
Qalany jaıaý aralaý kezinde birneshe qoǵamdyq keńistikke bardym. Olar: «Demalys Promenade» demalys kúni serýendeýge arnalǵa kóshe (Á.Mámbetov kóshesi boıynda), «Jastar» saraıynan «Mýzykalyq jas kórermender teatryna» deıin jalǵasatyn «Teatralnyı» jaıaý júrginshilerge arnalǵan jelekjoly, arbat (qalalyq saıabaq). Osylaısha, «Demalys Promenade» pen «Teatralnyı» jelekjolyn abattandyrý – qalanyń tarıhı tusynda turǵyndardyń bos ýaqytyn jaıly ótkizýi úshin shaǵyn aýdan ashýǵa, sol sııaqty jaıaý júrý belsendiligin arttyrýǵa jáne osy baǵytty ary qaraı jaǵalaýmen baılanystyrýǵa múmkindik berdi.
Osyndaı tartymdy oryndardy ashýdy jalǵastyra beremiz. Máselen Jeltoqsan – Seıfýllın, Beıbitshilik jáne Omarov kóshelerinde, №1 emhananyń janynda taǵy bir qoǵamdyq keńistik ashýdy josparlap otyrmyz. Sol sııaqty qaraýsyz qalǵan «Jeruıyq-2» saıabaǵyn (B.Momyshuly men Tólebaev kósheleriniń qıylysy) abattandyramyz. Onda oıyn alańdary, voleıbol jáne basketbol alańdary, vork-aýt aımaǵy, serýendeý ınfraqurylymy, demalys aımaqtary jáne t.b. bolady.
Memleket basshysynyń tapsyrmasy boıynsha «Nur-Sultan – jaıly qala» master-jospary aıasynda qalanyń barlyq aýdanynda, ásirese eldi mekenderde aýlalar men qoǵamdyq keńistikterdi abattandyratyn bolamyz. Osylaısha, bıyl kútimsiz qalǵan ýchaskeler men bos oryndar sany aıtarlyqtaı azaıady. О́tken jyldary biz 500-den astam aýla men qoǵamdyq keńistikti abattandyrǵan bolatynbyz. Sol sııaqty buqaralyq sportty damytýǵa da basymdyq beriledi.
Qoǵamdyq keńistikter búldirshinder men jastar úshin de, aǵa býyn úshin de ýaqytyn paıdaly ótkizetin tartymdy ortalyqtarǵa aınalyp keledi. Osy jumystyń bárin turǵyndarymyz úshin jasaımyz. Sondyqtan bárimizge tıesili, ortaq múlikke uqyppen qaraýǵa shaqyramyn», dep jazdy elorda ákimi.