Qaraǵandyda zeınetkerlerdi aldap júrgen alaıaqtar ustaldy, dep habarlaıdy Egemen.kz Polisia.kz portalyna silteme jasap.
Jyl basynan beri Qaraǵandyda qarttardy aldap, qurban qylyp júrgen alaıaqtar paıda boldy. Bul rette qaskúnemder jábirlenýshilerge ózderin týysqandarymyz dep tanystyrǵan. 3 aqpanda Qaraǵandy qalalyq PB Ortalyq polısııa bólimine 73 jastaǵy qala turǵyny júgingen.
Zeınetkerdiń aıtýynsha, ájeıge belgisiz bireý kelip, ózin jıeniniń dosy ekenine sendirgen. Kútpegen qonaq ájeıden týysyna 300 myń teńge qajet ekenin aıtyp, suraǵan. Alaıaqqa senip, zeınetker oǵan qajetti somany berdi. Biraz ýaqyttan keıin ol jıenimen baılanysyp, týysyna qarjylyq qoldaý qajet emes ekenin biledi.
25 naýryzda sol Ortalyq PB-ǵa 66 jastaǵy zeınetkerden ótinish tústi. Zeınetkerge bir azamat qońyraý shalyp, ózin Reseıde turatyn uly ekenin aıtyp, noýtbýk satyp alý úshin shuǵyl túrde 250 myń teńge qajet ekenin málimdegen. Ol eshqandaı kúdik týdyrmaǵandyqtan zeınetker ol aıtqan shotqa 250 myń teńge aýdarǵan. Osydan keıin áıel ulyna qońyraý shalyp, aqsha túskenin surasa, oǵan noýtbýk qajet emes ekeni belgili bolǵan.
Barlyq faktiler boıynsha QR QK 190-baby (Alaıaqtyq) boıynsha qylmystyq is qozǵaldy. 22 sáýirde jedel-izdestirý is-sharalary barysynda Ortalyq PB krımınaldyq polısııa qyzmetkerleri Qaraǵandy q. PB qyzmetkerlerimen birlesip Temirtaý qalasynyń 39 jáne 44 jastaǵy eki turǵynyn ustady. Olar qylmystaryn moıyndady.
Sotqa deıingi tergeý barysynda polıseıler qaskúnemderdiń taǵy da osyndaı 12 qylmysqa qatystylyǵyn anyqtady. Olar keltirgen zalaldyń jalpy somasy 7 mln 177 myń teńgeni qurady. Qaskúnemder ýaqytsha ustaý ızolıatoryna qamaldy.
Aıana Toǵanbek