Memleket basshysy Qasym-Jomart Toqaev Ishki ister mınıstri Marat Ahmetjanovty qabyldady, dep habarlaıdy Egemen.kz Aqordanyń resmı saıtyna silteme jasap.
Prezıdentke elimizdegi krımınogendik jaǵdaı týraly málimet berildi. Vedomstvo basshysynyń aıtýynsha, qylmystyq ister kórsetkishi 7,6 paıyzǵa tómendegen. Sonyń ishinde densaýlyqqa aýyr zaqym keltirý, qaraqshylyq, tonaý, mal urlyǵy, buzaqylyq, alaıaqtyq jáne zorlaý derekteri aıtarlyqtaı azaıǵan.
Mınıstr qańtar oqıǵasy kezinde jasalǵan qylmystardy tergep-tekserý, kinálilerdi anyqtap, jaýapqa tartý, urlanǵan qarýlardy zańsyz aınalymnan alý jumystary jóninde esep berdi.
Sonymen qatar Memleket basshysy qaýipsizdik máselelerin qoǵammen seriktestik ornatý arqyly sheshýge negizdelgen polısııanyń servıstik modeliniń engizilý barysymen tanysty.
Marat Ahmetjanov Prezıdentke Ishki ister mınıstrliginiń qyzmetin bıýrokratııadan aryltý, sıfrlandyrý jáne jumys úderisin avtomattandyrý, ishki rásimderdi ońtaılandyrý jóninde baıandady.
Budan bólek ol úderisterdi jedel basqarý úshin Big Data taldaý quraldaryn paıdalana otyryp, krımınogendik jaǵdaıdy monıtorıngteý úshin IIM-niń Ahýaldyq saraptama ortalyǵynyń qurylǵany jóninde baıandady.
Qasym-Jomart Toqaevqa Jol júrý erejelerin qasaqana buzǵandardy anyqtaýǵa baǵyttalǵan «Qorǵaý» dep atalatyn jańa baǵdarlama tanystyryldy. Mınıstr Memleket basshysyna Nur-Sultan, Almaty jáne Shymkent qalalarynda baǵdarlamany qoldaný arqyly júrgizilgen jumystardyń nátıjeleri týraly aıtty.
Sondaı-aq Prezıdentke Qaýipsizdik máselelerin azamattyq qoǵammen seriktestik ornatý arqyly qamtamasyz etý tujyrymdamasynyń jobasy ázirlenip jatqany jóninde málimet berildi.
Kezdesý qorytyndysy boıynsha Prezıdent polısııanyń servıstik modelin odan ári engizý, elimizde azamattardyń qaýipsizdigi men quqyqtyq tártipti qamtamasyz etý jóninde birqatar naqty tapsyrma berdi.
Osy rette Memleket basshysy jol qaýipsizdigin qamtamasyz etý salasyndaǵy jaýapkershilikti qatańdatý qajet ekenin erekshe atap ótti.
Aıana Toǵanbek