Ustalǵan azamat talaıdyń aqshasyn jymqyrǵan qylmystyq toptyń negizgi múshesi bolǵan, dep habarlaıdy Egemen.kz.
Krımınaldyq polısııanyń málimetinshe, 1993 jyly týǵan K.esimdi azamat qazaqstandyqtardy aldap kelgen birneshe qylmyskermen birlesip jumys istegen.
«Másele azamattarǵa qońyraý shalyp, ózderin bank qyzmetkeri retinde tanystyratyn telefon alaıaqtary týraly bolyp otyr. Odan ári olar, ózderiniń atynan bireý onlaın nesıe bermekshi ekendigin habarlaıdy. Eger jábirlenýshi qýlyqqa túsip qalsa, onda qońyraý shalýshy jınaqty «rezervtik shotqa» aýdarýdy usynady, osylaısha qylmysker basqa adamdardyń aqshasyn ózine aýdaryp otyrǵan. Dál osyndaı «rezervtik shottardy» K.esimdi azamat qamtamasyz etti. Dálirek aıtsaq, ol adamdardy taýyp, olardyń kartalary arqyly aqsha alýdy usynyp, osy arqyly qomaqty qarjy alýǵa bolatynyn anyqtap otyrǵan. Ruqsat etilgen tintý kezinde kúdiktiden ártúrli ekinshi deńgeıli bankterdiń 157 kartasy tárkilendi», dedi Almaty qalalyq polısııa departamenti bastyǵynyń orynbasary, polısııa polkovnıgi Berik Ábilbekov.
Sonymen qatar jaldamaly páterde K.esimdi azamatpen birge taǵy úsh er adam ustaldy. Olar 23 jáne 25 jastaǵy Shyǵys Qazaqstan, Pavlodar oblystarynan kelgen azamattar.
«Bul adamdardyń mindetterine kartochkalarǵa túsken aqshany qolma-qol aqshaǵa aınaldyrý kirdi. Qazirgi ýaqytta joǵaryda atalǵan azamattardyń osyǵan uqsas basqa da qylmystarǵa qatystylyǵyn anyqtaý boıynsha tergeý sharalary júrgizilýde. Kináliler jaýapqa tartylyp, azamattardan aqsha alýdyń tizbegi tolyqtaı belgili bolady», dedi Berik Ábilbekov.
Aıana Toǵanbek