Utylystan utarymyz kóp

Keshe Ortalyq kommýnıkasııalar qyzmetinde Ulttyq kásipkerler palatasy basqarma tóraǵasy­­­nyń orynbasary Rahym Oshaqbaev pen «Qaıtalama metallýrgııa ónerkásipshileriniń respýblıkalyq odaǵy» qaýymdastyǵynyń tóraǵasy Vladımır Dvoreskıı brıfıng ótkizdi. Baspasóz máslıhatynda otan­dyq kásipkerlerdiń Eýrazııa­­­lyq ekonomıkalyq odaqta qalaı jumys isteıtindigi týraly áńgimelendi. Birtutas ekonomıkalyq keńis­tikte qazaqstandyq bıznestiń básekelestikke tótep bererlik múmkindigi de sóz boldy. Osy ara­da, palata basqarmasy tóraǵa­synyń orynbasary kásipkerler Eýrazııalyq ekonomıkalyq odaq­tyń jaqtaýshysy ekenin aıta otyryp, sharttyń keıbir tustaryn áli de jetildire túsý kerektigine nazar aýdardy. Sóıtip, jýrna­lısterge «kelisimderdi jetildirý týraly usynystarymyz ben ekonomıkalyq ıntegrasııaǵa degen kózqarastarymyzdy shatas­­tyryp almaýlaryńyzdy ótinemin», dedi. Usynys aıtý, pikir talas­tyrý kádimgi jumys úderisi ekenin aıtty. Qazaqstan, Reseı, Belarýs elde­riniń Eýrazııalyq ekono­mı­ka­lyq odaq qurý jónindegi shartynyń sońǵy nusqasy Ulttyq kásipkerler palatasynyń saıtynda birer kúnde jarııalanatyn kórinedi. «Kelesi aıdyń sońy­­na taman Eýrazııalyq ekonomıkalyq odaq qurý týraly shartqa qol qoıylady. Sóıtip, kelisim aldaǵy jyl­dyń birinshi qańtarynan kúshine enedi. Osylaı, eýrazııa­lyq ıntegrasııa óziniń kelesi kezeńine qadam basatyn bolady», dedi R.Oshaqbaev. Onyń aıtýyna qaraǵanda, Qazaq­stannyń bıznes-qaýymdastyǵy Ulttyq kásipkerler palata­sy­nyń pikir almasý alańy arqyly osy shartty jasaýda qazaq­stan­dyq ustanymdy naqtylaýǵa belsendi túrde tartylypty. Ulttyq kásipkerler palatasy byltyrǵy kúz aılarynan beri óz saıtynda sharttyń mańyzdy nusqalaryn jarııa­lap keledi eken. Dál osy ýaqytta sharttyń bes nusqasy ornalastyrylǵan. Endi alqanyń qorytyndy keńesiniń aldynda, sharttyń sońǵy nusqasy birer kúnde daıyndalyp bolyp, ol da palata saıtynda jarııalanady. Osydan keıin barlyq kásipkerler, qaýymdastyqtar qujatty zerttep, zerdelep, óz usy­nystaryn aıtýǵa múmkindik týmaq. Muny da basqarma tór­­aǵa­sy­nyń orynbasary aıtty. Son­daı-aq, ekono­mıkalyq odaq aıasyn­da Qazaq­stannyń shaǵyn jáne orta bız­nesi órkendeı túsetinin de zor senimmen tilge tıek etti. «Biz ekonomıkalyq yqpaldastyqtyń belsendi jaqtaýshylarymyz. Ony qurý barysynda Úkimetke bıznestiń quqyqtaryn saqtaýǵa baǵyttalǵan utymdy tetikterdi usynyp júrmiz. Integrasııaǵa kúmán keltirýdiń keregi joq. О́ıtkeni, bul ıgiligi mol shara. Onyń eń basty paıdasy – qazaqstandyq kásipkerlerge 170 mıllıondyq naryqqa jol ashylady. Ol bizdiń naryqtan on ese úlken ekeni aıtpasa da túsinikti», dedi R.Oshaqbaev. Úsh el arasyndaǵy bul árip­testikte Qazaqstannyń usta­nym­dary óte utymdy kórinedi. Máse­len, Qazaqstan Reseı men Belarýs elderine qaraǵanda, bıznes-ahýal ja­­­ǵynan ozyq tur. Ony kóptegen sarapshylar moıyndaǵan. Naqty dáleli, bizdiń elde salyq deńgeıi tómen. Oǵan qosa, jekemenshik quqyq­tary qatań saqtalady. Sondaı-aq, bizde bızneske qajettiń bárine qoljetimdi. Taıaýda qabyl­dan­ǵan zańnama boıynsha kez kelgen kásipkerlik sýbektisi Úkimetke óz usynysyn joldaı alady. Mundaı jaǵdaı Reseı­de de, Belarýste de joq. Osynyń arqasynda, Qa­zaq­stan áriptesterine qaraǵanda, Eýra­zııalyq ekonomıkalyq odaq ­aıasynda básekelestikke tótep bere alary anyq, deıdi basqarma tóraǵasynyń orynbasary. Mu­nymen birge, bizdiń elge ınvestısııalar men kásipkerlerdi tartýǵa da barlyq qolaılylyqtar jasalypty. Osy ıgiliktiń bárin eksheı kelip, yqpaldastyqtan túsetin ekonomıkalyq paıdany joqqa shyǵarmaýymyz kerektigine nazar aýdardy. Nurbaı ELMURATOV, «Egemen Qazaqstan».