Qońynan et kesetin jaqyn janǵa,
Aǵynan jarylatyn asyl zada,
Aparǵan bizdi bastap Baıqońyrǵa
Qaıran dos Quttaıaqov Shákızada.
Sol kúni ashylyp bir arman gúli,
Qazaqtyń baq juldyzy janǵan kúni.
Toqtardaı arystan er aıǵa atylyp,
Jeti qat kókte zaýlap samǵar kúni.
Ǵaryshqa ushady dep qyran qusym,
Bar qazaq toılaǵandaı qýanyshyn.
Mereıim, maqtanyshym, jubanyshym –
Meniń de jan-júregim jyrlady shyn.
Bolmaıdy uly dýda usaqtaǵan,
Qalaısha sezimimdi tusap qalam.
Kýá bop ǵajapqa bul
Turǵanymda
Elbasy Nuraǵamnan úsh-aq qadam!
Atyldy bir-aq sátte keme kókke,
Antalap qarap qaldyq keremetke.
Keterdeı kókke birge kóterilip,
Kómkerip kóńil kóktem-kóbelekke.
Dúrkirep dúnıemnen sel qozdaǵan,
Kúrkirep zor únimen jer qozǵaǵan.
Shanshylyp kókke keme órlegende
Mańqıyp qala bergen mańǵaz dalam.
Burq etken ot-jalyny qaýlaı berdi,
Tik ushqan kókke keme zaýlaı berdi.
Arsyǵa amandasyp qol sozǵandaı
Kóldeı nur kókirekten saýlaı berdi.
Qadalyp qalt etkizbeı janarymmen,
Júıtkýin ǵalamattyń baǵamyn men.
Kórinbeı kókke sińip ketkeninshe
Ár sátin bul ǵajaptyń sanadym men.
«On, on bir...» degenimshe sińdi kókke,
Sebildi súıinshilep nur júrekke.
Ǵaryshqa kemeni aman alyp shyqqan
Shattandyq alaqaılap qudiretke.
Jerdiń de jeńgenine tartylysyn,
Kóńilder kókteı búrlep shalqydy shyn.
Keshegi Toqtar aıtqan sózi qandaı:
«Bul ushý qazaǵyma, halqym úshin!»
Máz-meıram, máre-sáre sol arada,
Uqsadyq tolqyn ópken shaǵalaǵa.
Bir-birin qushaqqa jurt
alyp jatyr
Sharpyǵan shattyq
kúıden jańa ǵana.
Esimde shashýdyń da shashylǵany,
Aspanym sógilip bir ashylǵany.
Qasymda qyzyl kıgen qyrmyzy qyz
Bas salyp moıynyma asylǵany.
Aldy ma shóp etkizip súıip te bir,
Áıteýir júre bergen ıip kóńil.
Qas-qaǵym qýanyshtan alaburtyp,
Asqandaı aqsha bultty bıikke bir.
Aqsarbas aıtarlyqtaı ǵajap bul is,
Ǵaryshqa kóterildi qazaq tuńǵysh.
Samala quıryǵynyń qus jolymen
Sońynan ushyp ketpeı az-aq turmyz.
Qus sezim qushtarlyǵy tarqamady.
Toqtardyń qaryndasy.
Qarqaraly.
Aǵaǵa aq jol tilep kelgen eken
Arnaıy aýylynan Arqadaǵy.
Ǵajabyn bolǵan jaıdyń terbedim kóp,
Ol qyzdy odan keıin kórgenim joq.
Qaldy tek qaıta kelmes sol bir sátter
О́tkenniń umytylmas órnegi bop.
Qorǵanbek AMANJOL.
ALMATY.