Keshe Beıbitshilik jáne kelisim saraıynda jas oryndaýshylardyń HHIII «Jas qanat» baıqaýynyń alǵashqy kezeńi bastaldy. Elimizdiń ár óńirinen iriktelgen balǵyn órenderdiń baıqaýy úsh kúnge sozylady. Sáýirdiń 13-i kúngi qorytyndy gala-konsertte jeńimpazdar anyqtalady.
Jyl saıyn ótetin dástúrli án baıqaýy bul joly da ádettegideı balaýsa órenderge elordanyń kórikti jerlerin aralatý, mádenıet oshaqtarymen tanystyrý, mádenıet pen ónerdiń tanymal ókilderimen júzdesý, pikir almasý sekildi alýan mańyzdy sharalarmen órildi. Osy jaǵynan súıikti Astana jastardy úlken sahnaǵa jeteleýde, án ónerine degen talǵam-talabyn kúsheıtýde, ómirden óz ornyn taýyp, balǵyn qanatyn qataıtýda aıtarlyqtaı ról atqaryp kele jatqany shyndyq.
Sondaı este qalar sharanyń biri «Astana Opera» memlekettik opera jáne balet teatrynda ótken kezdesýge jastar úlken yntamen keldi. Aıta ketý kerek, elorda teatry Astanaǵa kelgen qonaqtar jıi bas suǵatyn eń kórikti ǵımarat sanalady. Sol sebepti de, ónerli órender úshin mundaǵy árbir zal men sahnalyq erekshelikti aralap, tamashalaýdyń jóni bólek. Eńseli ásem ǵımarattyń ishki saltanatyna súısingen jasqanattyqtardy munan keıin teatr dırektory, belgili kompozıtor Tólegen Muhamedjanov qabyldady. Mádenıet qaıratkerimen kezdesýde jastar kompozıtordyń roıaldegi súıemeldeýimen «Men dep oıla», «Aıaýlym» ánderin qosyla shyrqap, estelik sýretke tústi. Mýzyka maıtalmany jastarǵa: «Án salyńdar. О́zderiń súıgen ispen shuǵyldanyńdar. Armandaryńa jetińder!» dep sáttilik tiledi. Baıqaýǵa qatysýshylar elordanyń ásem jerleri sanalatyn «Dýman» oıyn-saýyq ortalyǵynda, Qazaq ulttyq óner ýnıversıtetinde bolyp shattyqqa keneldi. Álemdegi eń iri oqý oryndarymen tyǵyz qarym-qatynastaǵy ýnıversıtette bilim alýdyń ózi órender úshin úlken arman desek te, baıqaýǵa qatysýshylardyń arasynda osy oqý ornynda oqıtyn jastardyń bolýy kóp jaıtty ańǵartsa kerek. Sonyń biri – úshinshi kýrs stýdenti Nursultan Qarabalıev esimdi ónerpaz. Báıgege úkilep qosqan úzdikteri jeńip shyǵýyna úmitti ýnıversıtet basshylyǵy jastardy ystyq yqylaspen qarsy aldy. Munda bilim alyp jatqan jastardyń ónerge baýlynýy olardy qatty qyzyqtyrdy. Oqý orny basshylyǵy tarapynan mýzykanttar men bıshilerdiń sahnaǵa daıyndyǵymen, galereıa kórmesimen, jas sýretshi-músinshilerdiń shyǵarmashylyq jumystarymen, túsirilim alańynda qııal-ǵajaıyp kınonyń túsirilý ádisterimen jaqynyraq tanysyp shyǵýǵa tolyq jaǵdaılar jasaldy.
Mine, júrekteri alyp-ushqan órenderdiń asyǵa kútken syn saǵaty da kelip jetti. Alǵashqy sahna. Asaý tolqyndaı alaburtqan kóńil. Lúpil soqqan názik júrekter. Kóktemniń únimen jarysa syńǵyrlaǵan móldir bulaqtar. On eki qaladan báıgege on tórt ónerpaz qatysýda. Baıqaýdyń taǵy bir ereksheligi, Astana, Kókshetaý, Taldyqorǵan, Oral, Aqtóbe, Semeı, Qaraǵandy sııaqty qalalarmen qatar Arys (OQO), Áıteke bı (Aqtóbe), Aıagóz (Semeı) syndy óńirlerden shyqqan jastardyń ónerin tamashalaý múmkindigi týyp otyr.
Aıda AHMETJAROVA.
–––––––––––––––––––
Sýretti túsirgen
Sultan SEIITOV.