«Qazaqmys korporasııasynyń» beısenbi kúni Astanada ótken forýmy osylaı ataldy. Qazaqstandyq úlesti damytýǵa aıryqsha jol ashyp otyrǵan mundaı jyl saıynǵy forým bıyl besinshi ret uıymdastyryldy. Forýmǵa otandyq kásiporyndardyń, damý ınstıtýttary men memlekettik salalyq vedomstvolardyń 500-den astam delegaty qatysty.
Iá, qazaqstandyq úlesti arttyrýǵa elimizdiń barlyq kompanııalary, iri óndiris oryndary barynsha atsalysýǵa tıis. Bul – Elbasy júktegen mańyzdy mindetterdiń biri. Osyny basty baǵytta ustanǵan «Qazaqmys korporasııasy» jyl saıyn otandyq kompanııalardyń basyn qosyp, ashyq pikir alańyna jınaýdy dástúrge aınaldyryp otyr. Onda eń bastysy, barlyq qatysýshylarǵa kelissózder júrgizýge jáne ónimder men qyzmetter kórmesine qatysýǵa múmkindik berilgen.
«Qazaqmys» Qazaqstandaǵy eń iri ári álemdegi aldyńǵy qatarly mys óndirýshi ekeni bárimizge belgili. Endeshe, osyndaı alpaýyt óndiris oshaǵynyń qazaqstandyq úlesti damytýǵa barynsha kúsh salýy mańyzdy. Sońǵy 5 jyl ishinde «Qazaqmys korporasııasy» otandyq kompanııalardan 560 mlrd. teńgeden astam somaǵa taýarlar, jumystar men qyzmetter satyp alypty. Osy jyldar ishinde kompanııa qazaqstandyq úlesti damytý isindegi kóshbasshy retinde «Altyn Gefest» atty ulttyq salalyq syılyǵymen eki márte marapattalǵan. 2013 jyly kompanııa 223,8 mlrd. teńgeniń taýarlaryn, jumystaryn, qyzmetterin satyp alǵan, sóıtip byltyrǵy jyly qazaqstandyq úles onyń aldyńǵy jylǵymen salystyrǵanda 5 paıyzǵa ósip, 67 paıyzdy quraǵan.
Aıta ketsek, «Qazaqmys korporasııasy» shaǵyn jáne orta bıznestiń damýyn yntalandyrý boıynsha keshendi jumys júrgizip keledi. Kompanııa satyp alý jáne uzaq merzimdi sharttarǵa qol qoıý jolymen ǵana emes, sondaı-aq beıindik emes sehtardy aýtsorsıngke berý jolymen, jabdyqtardy jańartýǵa, jańa óndirister ashyp, olardy ulǵaıtýǵa qarjylyq kómek berý jolymen qoldaý kórsetýde. Osy baǵyttaǵy jumystardy bir júıege keltirý úshin alǵashqylardyń biri bolyp, qazaqstandyq úlesti damytý jóninde basqarma da qurǵan. Al «Qazaqmystyń» shaǵyn jáne orta bıznesti damytý ári qoldaý boıynsha keshendi baǵdarlamasy seriktes kásiporyndarǵa óz ónimderiniń túrlerin ulǵaıtýǵa, óndirisin jańǵyrtýǵa, sapasyn arttyrýǵa, jańadan jumys oryndaryn ashýǵa jáne ótkizý naryǵyn ulǵaıtýǵa múmkindik berip otyr.
Kompanııanyń monoqalalardy damytý boıynsha da jeke baǵdarlamasy bar. Baǵdarlamany iske asyrý maqsatymen Jezqazǵan aımaǵy men Balqash qalasynyń kásipkerleri jáne ónerkásipshileriniń qaýymdastyǵy jáne odaǵy Qurylyp, olarmen 2013 jyly jalpy somasy 22 mlrd. teńgege 650-den astam kelisimshart jasalypty. Olardyń quramyna qyzmetkerleriniń jalpy sany 4500 adamdy quraıtyn 92 kásiporyn enip otyr. О́tken jyl ishinde olar 204 jumys ornyn ashqan.
Igi sharalarǵa taǵy bir mysal, korporasııa bastamasymen taý-ken shahta jabdyqtary salasynda ımport almastyrý máselesin sheshý úshin Qazaqstanda qosalqy bólshekter men toraptar jasap shyǵaratyn, sondaı-aq jetkizilgen tehnıka men jabdyqtarǵa qyzmet kórsetetin, jergilikti qyzmetkerler quramyn oqytyp otyratyn birlesken kásiporyndar ashylǵan. Tize bersek, árıne, atqarylǵan jumystar az emes, josparly jobalar da jeterlik. Eń bastysy, sonyń bári «Qazaqstandyq ónim jasaýdy» basty baǵytqa alǵan. Keshegi besinshi forýmnyń da negizgi maqsaty osy boldy.
Dınara BITIKOVA,
«Egemen Qazaqstan».