Respýblıka Qarýly Kúshteri Bas shtaby bastyǵynyń orynbasary – tárbıe jáne ıdeologııalyq jumystar departamentiniń jetekshisi, polkovnık Muhamedjan Talasovtyń basqarýyndaǵy aqparattyq-nasıhat toby Qyzyljar óńirinde bolyp, Joldaýdyń basym qaǵıdattaryn túsindirdi.
Áskerı-patrıottyq klýbtar men jas armııashylar ortalyqtarynyń ókilderimen júzdesýde sapar maqsaty jurtshylyq arasynda Qarýly Kúshterdiń bedelin nyǵaıtýdy, óskeleń urpaq boıyna qazaqstandyq patrıotızm rýhyn qalyptastyrýdy ditteıtini aıtylyp, bul baǵyttaǵy atqarylyp jatqan is-sharalardan habardar etildi. Onda sóz alǵan M. Talasov tarıhı qujattyń maqsattary men mindetterin júzege asyrý jónindegi naqty sharalardyń ishinde qoǵamymyzdaǵy ulttyq birlik, beıbitshilik pen kelisim, óńirlik qaýipsizdik máseleleri basty taqyryp bolyp tabylatynyn jetkize kelip, jastardy Memleket basshysy Nursultan Nazarbaev belgilep bergen jańa qazaqstandyq patrıotızm rýhynda tárbıeleý joldaryna toqtaldy. Elin, Elbasyn súıetin patrıot qalyptastyrý–barshamyzdyń mindetimiz. «Máńgilik el» ıdeıasy qazaqstandyqtardyń izgi armandary men kúsh-jigerlerin bir arnaǵa toptastyryp, elimizdiń jarqyn bolashaǵyna jeteleıtin basty qujat bolyp tabylady. Bul oraıda, belsendi, bilimdi, densaýlyǵy myqty, elimizdiń laıyqty azamattary retinde ósip kele jatqan jastarǵa Elbasy úlken senim, zor jaýapkershilik júktedi.
Delegasııalyq topty aımaq basshysy Samat Eskendirov qabyldap, elimizdiń ekonomıkasyn arttyrýda soltústikqazaqstandyq jastardyń alar orny eleýli ekenin, olardyń boılaryna mindet, abyroı, paryz, borysh sekildi qasıetti uǵymdardy sińirý jolynda irgeli ister atqarylyp jatqanyn, óńirde jumys isteıtin 10 áskerı-patrıottyq klýb pen 14 jas armııashylar ortalyǵynyń negizgi qyzmeti Otandy, eldi, jerdi súıý ıdeıalaryn uǵyndyrýǵa baǵdarlanǵanyn jetkizdi. M. Talasov óz sózinde keń aýqymda órbigen áńgime úshin rızashylyǵyn bildirdi. Qorǵanys mınıstrligi, oblystyq ákimdik jáne jas armııashylardyń respýblıkalyq shtaby arasynda áskerı-patrıottyq jumystardy odan ári nyǵaıtý jónindegi memorandýmǵa qol qoıyldy.
Qalalyq mádenıet úıinde soǵys, Qarýly Kúshter, ınternasıonalıst-jaýyngerler ardagerleriniń, jastar uıymdary ókilderiniń qatysýymen ótken keńeıtilgen jıynda Qarýly Kúshter Bas shtabynyń orynbasary – tárbıe jáne ıdeologııalyq jumystar departamentiniń jetekshisi M. Talasov «Patrıotızm – memlekettiliktiń negizi» degen taqyrypta baıandama jasap, «Máńgilik elge» bastaıtyn eń abyroıly, eń mártebeli jol – «Qazaqstan-2050» Strategııasynyń maqsattaryn iske asyrý joldarynan jan-jaqty maǵlumat berdi. Sońǵy jyldary elimizdiń Qarýly Kúshteriniń qurylymdyq bazalyq, materıaldyq-tehnıkalyq jaraqtaný jaǵynan nyǵaıyp, qatary kúshi myǵym, rýhy joǵary senimdi qorǵaýshylarmen tolyǵa túskenin ańǵarý qıyn emes. Mamyr aıynda Astanada «KADEX-2014» áskerı tehnıkalar men qarýlanýdyń halyqaralyq kórmesi men áskerı parad ótýi – armııamyzdyń kásibı sheberliginiń kemeldenýiniń aıǵaǵy. Áskerı daıyndyq júıesin jetildirý baǵytynda mańyzdy qadamdar jasalyp, tájirıbelik sabaqtar, atý alańdaryna shyǵý múmkindikteri kóbeıdi. Otan qorǵaý qataryna shaqyrylýshylar arasynda áskerı-patrıottyq tárbıe sharalaryn keshendi júrgizýge udaıy nazar aýdarylady. Almaty qalasynda alǵashqy áskerı-tehnıkalyq mektep ashyldy. Bıyldan bastap «Jas ulan» áskerı ánder festıvaline oqý oryndarynyń ókilderi de qatysatyn bolady. Qazaq radıosymen birlese otyryp, «Áskerı ánder» atty mýzykalyq radıo joba efırge shyǵady. Konkýrstyq gala-konsert Tuńǵysh Prezıdenttiń týǵan kúni qarsańynda ótedi.
Basqosý Qorǵanys mınıstrliginiń ortalyq ansambliniń konsertine jalǵasty.
О́mir ESQALI,
«Egemen Qazaqstan».
Soltústik Qazaqstan oblysy.