Reseı Federasııasyndaǵy Hakasııa parlamentiniń tóraǵasy Vladımır Shtygashev Qazaqstan halqy tarapynan túsinispeýshilik týǵyzǵan óziniń JK Prezıdıýmyndaǵy aıtqan sózderine qatysty málimdeme jasady. Bul týraly QazAqparat habarlady.
Eske sala keteıik, jergilikti basylymdardyń biri Joǵary keńes tóraǵasynyń myna bir sózin keltirgen bolatyn: «Shyǵys Qazaqstan oblysy, nemese kendi Altaı. Kendi Altaı ár kezde de Reseı quramynda bolǵan. Qazaqstannyń óz jeri negizi az edi. Osy jerdi berý jóninde sheshim qabyldandy, sol kezde ótip ketken... Biz Qazaqstanǵa 5 oblysty berdik...».
Parlament baspasóz qyzmeti onyń sózderinde eshqandaı saıası astar bolmaǵandyǵyn aıtyp sendirýge tyrysty.
Endi Shtygashev bul máselege qatysty óziniń jeke pikirin bildirip otyr. Onyń málimdemesin Hakasııa basshysynyń ákimshiligi taratty:
«Jekelegen buqaralyq aqparat quraldary taratqan meniń birqatar pikirlerim ekiushty túsinik qalyptastyrǵanyna ókinishtimin.
Men tatý-tátti ári kópultty ujymy bar balalar úıinde tárbıelendim. Ol soǵystan keıingi ýaqyt bolatyn. Sodan beri kóptegen ózge ultty dostarymmen áli kúnge deıin qarym-qatynasymdy úzgen joqpyn. Biz ortaq til tabysyp, bir-birimizdiń dástúrimizdi jáne túpki shyqqan ultymyzdy qurmettedik.
Reseı ımperııasynyń, keıin KSRO-nyń shekarasy qalaı ózgergendigi týraly tarıhı turǵydaǵy oı-pikirlerim osyndaı oǵash qabyldanǵanyna qatty tańqalamyn. Eshbir memleketke, sonyń ishinde Qazaqstanǵa tarıhı quqyq pen aýmaqtyq narazylyq týraly eshqashan aıtqan emespin. Olar bizdiń kórshi, bizdiń dosymyz jáne áriptesimiz. Meniń sózderim el arasynda túsiniksizdik týǵyzyp, baýyrlas halqymyzdyń kóńiline qaıaý túsirgeni meni qatty qynjyltady. Eger men ózimniń sózderimmen bireýdi lajsyz renjitsem, shyn kóńilimmen keshirim suraımyn».
Sáken Maılybaı.
Derekkóz: QazAqparat.