Bir shańyraq astyndaǵy mereke

Án áýelep, kúı kúmbirlegen orta­lyq alańda jármeńkedegi saýda da qyza tústi. Saýda dúńgirshekterinde óńir sharýalarynyń et, sút, bal, kon­dı­terlik ónimderi satylsa, kelesi qatar­lar­da teri, jún, aǵashtan jasalǵan ult­tyq buıymdar men áshekeıler kór­mesi qoıyldy. Kórmege «Eńbek» baǵ­dar­la­masy boıynsha grant alǵan kásip­ker­diń jıyrmasy túgel qatysty. 200 AEK kóleminde grant alǵandar bul somany óz isin bastaýǵa jumsaǵan. Atap óterligi, bıyl grant mólsheri eki esege artyp otyr.

Ashyq aspan astynda dámhana uıym­dastyrylyp, jurtshylyq alańda pisi­ril­gen dámi til úıirer káýap pen palaýdan, ystyq baýyrsaqtan dám tatty. Kúsh synasamyz degenderge túrli sport alańdary ashyldy. Sondaı-aq kishkentaı baldyrǵandar úshin oıyn-saýyq alańy uıymdastyrylyp, balalarǵa «Emıl» kásiporny tarapynan 900 balmuzdaq taratyldy.

– Biz úshin Birlik kúni – naǵyz ot­ba­sylyq mereke. Alańǵa balalary­myzdy ertip keldik. Merekelik kóńil kúı seziledi, aýa raıy da tamasha. Barsha óńir turǵyndaryn merekemen quttyqtap, beıbit ómir, myqty densaýlyq tileımiz! – deıdi óskemendik Rýslan Noǵaıbaev.

Osy kúni Dostyq úıiniń aldyndaǵy alańda «Jańa Qazaqstan – myzǵymas birlik mekeni» merekelik is-shara­sy ótti. Dostyq úıi men Qazaqstan hal­qy Assambleıasynyń belsendileri, etno­mádenı birlestikter áserli kon­serttik baǵdarlama usynyp, ulttyq bı festıvalin, «Assambleıa dastar­qany» ulttyq taǵamdardyń kórmesin uıymdastyrdy. Túrli etnostardyń án-bıleri kópshiliktiń kóńilin kóterip, kúshimiz birlikte ekenin kórsetti.

Aıta keterligi, Dostyq úıi bıyl 30 jyldyq mereıtoıyn atap ótpek. 1992 jyly О́skemende eldegi tuń­ǵysh Dostyq úıi ashylyp, ishinde al­ǵashqy koreı, nemis, ázerbaıjan, tatar etnomádenı birlestikteri quryldy. Búginde Dostyq úıinde 22 birlestik ornalasqan. Merekelik is-sharalar keshkisin Arbatta ótken «Mádenıetter shoǵyry» atty jastardyń bı jarysyna ulasty. Dál osyndaı konsert, kórmeler oblystyń barlyq óńirinde ótip jatty.