Gýmanıtarlyq baǵytta oqıtyn doktoranttarǵa halyqaralyq jýrnaldarǵa maqala shyǵarý talabyn jeńildetý usynyldy. Joǵary oqý ornynan keıingi bilim berýge qatysty osy jáne ózge de mańyzdy usynystardy Bilim jáne ǵylym mınıstri Ashat Aımaǵambetov saladaǵy áriptesterimen birge talqylaǵanyn jetkizdi.
«Áriptestermen jınalysta joǵary oqý ornynan keıingi bilim berý boıynsha keıbir máselelerdi talqyladyq. Jıynda doktoranttarǵa Qazaqstan tarıhy, Qazaq fılosofııasy, Qazaq tili men ádebıeti sııaqty gýmanıtarlyq beıindegi birqatar baǵyttyń ereksheligin eskere otyryp, qoldanystaǵy talaptarǵa (WoS jáne Scopus tizbesine kiretin basylymdarda maqalalar jarııalaý) birneshe balama nusqalardy qosý usynyldy. Balama nusqalarǵa toqtalsaq, a) Bilim men ǵylym salasynda sapany qamtamasyz etý komıtetiniń (BǴSSQK) tizimine engizilgen jýrnaldarda 5 maqala jáne ǵylymı konferensııalardan 2 materıal; b) senimdi baspalarda (Elsevier, Brill, CRC Press, DeGruyter, Edward Elgar Publishing, Springer Nature jáne basqalary), sondaı-aq US News Best Global Universities Rankings, Academic Ranking of World Universities nemese Times Higher Education World University reıtınginiń top-100 quramyna kiretin ýnıversıtetterde monografııa shyǵarý», dedi mınıstr A.Aımaǵambetov.
Mınıstrdiń málimdeýinshe, byltyr BǴSSQK tizimine engizilgen ǵylymı jýrnaldarǵa qoıylatyn talaptar edáýir kúsheıtildi jáne tizimnen álsiz jýrnaldardy alyp tastap, eski tizim tolyǵymen jańartyldy. Sol sebepti vedomstvo basshysy bul sheshimdi jumystyń qısyndy jalǵasy dep sanaıtynyn jetkizdi. Árıne, tolyqqandy dáıeksóz júıesi boıynsha jumys sozylyp ketti, biraq soǵan qaramastan onyń qorytyndysy shyǵarylady.
«WoS jáne Scopus tizimine engizilgen jáne sanksııaǵa baılanysty derekter qorynan joıylǵan ǵylymı jýrnaldarda granttyq qarjylandyrý aıasynda jarııalanǵan qazaqstandyq ǵalymdardyń maqalalaryn, eger bul maqalalar buǵan deıin jarııalanýǵa qabyldansa, olardy taný múmkindigi talqylandy. Budan bólek, doktorantýraǵa túsý kezinde úmitkerlerge ózderiniń bolashaq dıssertasııasynyń ǵylymı negizdemesin (research proposal) usyný usynyldy. Doktoranttardyń zertteý quzyrettiligi boıynsha usynys bar. Buǵan deıin biz doktoranttardyń «Akademııalyq hat», «Ǵylymı zertteý ádisteri» pánderin mindetti túrde oqýyn engizdik. Bul quzyretter kez kelgen doktorantqa ǵylymı zertteýlerdi óz betinshe oryndaý úshin qajet. Osy pánderdi meńgerý úshin biliktilik emtıhanyn ótkizý usynylady», dedi vedomstvo basshysy.
A.Aımaǵambetovtiń aıtýynsha, bir ǵylymı jetekshige 15 doktorant, keıin birinshisi qorǵaýdan óte almaǵan jaǵdaıda taǵy beseýin bekitý tájirıbesi durys emes. Búginde ǵylymı jetekshiler kóp jaǵdaıda doktoranttarmen jumys isteýge jetkilikti kóńil men ýaqyt bólmeıdi. Bul máseleni sheshý úshin júıeli sharalar qajet. Osy usynystardy qosymsha saraptama men talqylaýdan ótkizgennen keıin naqty sheshim qabyldanady.