Qazaqstan delegasııasy Izraılge issaparmen bardy. Sapar barysynda profılaktıkalyq jáne ońaltý medısınasy salasyndaǵy birlesken ǵylymı-zertteý jumystaryn iske asyrý múmkindikteri talqylandy, dep habarlaıdy Egemen.kz.
QR Densaýlyq saqtaý mınıstrliginiń derekteri boıynsha 2022 jylǵy 5 mamyrdaǵy jaǵdaı boıynsha bir jarym myńnan astam qazaqstandyq KVI-dan emdelýdi jalǵastyrýda. 2020 jyldyń naýryz aıynan sanaǵanda 1,3 mln. astam adam aýyryp jazylǵan.
«Covid-19 bastan keshken basqa juqpaly jáne juqpaly emes aýrýlardyń aǵymyna áserin birlesip zertteý biz talqylaıtyn taqyryptardyń biri boldy», dedi Astana medısına ýnıversıtetiniń Basqarma tóraǵasy-Rektory Kamaljan Nadyrov.
Sapardyń negizgi maqsaty – Izraıldiń jetekshi joǵarǵy oqý oryndary - Tel-Avıv pen Ierýsalım ýnıversıtetteriniń jumysymen tanysý jáne strategııalyq seriktestik týraly memorandým jasasý máselesin pysyqtaý.
Bul JOO-lar álemniń úzdik ýnıversıtetteriniń qataryna kiredi (Tel-Avıv QS World University Ranking TOP-300 jáne Times Higher Education World University Ranking TOP-300 kiredi, al Ierýsalım JOO - QS World University Ranking TOP-200 jáne Times Higher Education World University Ranking TOP-350 engen).
«Birlesken ýnıversıtetter qurý máselesin pysyqtaý Astana medısına ýnıversıtetiniń bazasynda bilim berý baǵdarlamalary, onyń ishinde eki dıplomdy jáne MBA, dárigerler men meıirbıkelerdi daıarlaýdy neǵurlym sapaly deńgeıge shyǵarýǵa múmkindik beredi», dep atap ótti rektor.
Izraıl Densaýlyq saqtaý mınıstrliginiń Halyqaralyq yntymaqtastyq departamentiniń dırektory Asher Salmonmen kezdesý aıasynda Izraıldiń Densaýlyq saqtaý mınıstrliginiń Astana medısına ýnıversıteti dıplomyn taný máselelerin talqylady.
Sapar barysynda, sondaı-aq, akademııalyq utqyrlyq baǵdarlamalaryn uıymdastyrý, ıaǵnı ýnıversıtet stýdentteri men oqytýshylarynyń ızraıldik klınıkalarda taǵylymdamadan ótýi, sondaı-aq Izraıl ýnıversıtetteriniń oqytýshylaryn vızıtıng-professorlar retinde shaqyrý máseleleri qarastyryldy.
Albert Eınshteın negizin qalaǵan Ierýsalım ýnıversıtetimen PhD doktorlary men postdoktorantýra daıarlaýdyń birlesken baǵdarlamasyn iske qosý máselesi kóterildi.
Sondaı-aq, ýnıversıtet aýrýhanalarynyń, atap aıtqanda, Assýta medısınalyq ortalyǵynyń, «Shıba» medısınalyq ortalyǵynyń, halyqaralyq deńgeıde moıyndalǵan klınıkalyq jáne ǵylymı ortalyqtar bolyp tabylatyn Hadassa aýrýhanasynyń jumys tájirıbesi zertteldi.
Ýnıversıtet aýrýhanasynyń ınfraqurylymyn qurý jáne damytý, bilikti kadrlardy daıarlaý jáne birlesken klınıkalyq zertteýler júrgizý, sondaı-aq, ozyq medısınalyq tehnologııalardy engizý máseleleri boıynsha «Shıba» medısınalyq ortalyǵymen yntymaqtastyq týraly Memorandýmǵa qol qoıyldy.
Taraptar, sonymen qatar, Hadassa aýrýhanasynyń basshylyǵymen Nur-Sultan qalasynda osy aýrýhananyń fılıalyn ashý múmkindigi talqylandy.
Aıana Toǵanbek