Búgin Nur-Sultan qalasyndaǵy Demalys Promenade alańynda Otan qorǵaýshylar kúnine arnalǵan jeńil atletıkadan estafeta ótti. Oǵan 600 -ge jýyq jalpy bilim beretin mektep oqýshylary men orta jáne joǵarǵy stýdentter qatysty, dep habarlaıdy Egemen.kz elorda ákimdiginiń resmı saıtyna silteme jasap.
Nur-Sultan qalasy Dene shynyqtyrý jáne sport basqarmasynyń basshysy Samat Jylqybaevtyń sózinshe, dástúrli túrde ótetin bul jarystyń qatysyshýlary jyl sanap kóbeıip jatyr.
«Aldymen ózderińizdi kelip jetken 7 mamyr Otan qorǵaýshylar kúnimen jáne aldaǵy 9 mamyr UOS Jeńis kúnimen shyn júrekten quttyqtaımyn! Barlyǵymyzdyń mereıimizdi ústem etetin, elimizdiń aıbynyn asqaqtatar er-azamattarymyzdyń merekesi. Otan qorǵaýshylar kúnine jáne «UOS Jeńis kúnine» arnalǵan jeńil atletıkalyq estafeta jarysyna 600 -ge jýyq jalpy bilim beretin mektep oqýshylary men orta jáne joǵarǵy stýdentter qatysyp jatyr. Jyl saıyn dástúrli túrde ótkizilip kele jatqan jarystyń jyldan-jylǵa mártebesi artyp, qatysýshylar sanynyń kóbeıýi óte jaqsy jetistik», dedi S. Jylqybaev.
Onyń aıtýynsha, Memleket basshysy Qasym-Jomart Toqaev 2022 jyldy «Balalar jyly» dep jarııalady. Osy turǵyda Prezıdentimizdiń, Qazaqstan halqyna joldaýyn júzege asyrý, birqatar buqaralyq sportty damytý maqsatynda, balalar jyl aıasynda osyndaı jarystar uıymdastyrylyp jatyr.
«Elimizdiń órkendeý jolynda atqaryp jatqan ıgi qyzmetterińizge taýsylmas baqyt, mol yryzdyq, otbasylaryńyzǵa amandyq, denderińizge saýlyq tileımin! Deni saý urpaq – el bolashaǵy! Sondyqtan salaýatty ómir saltyn birge qalyptastyraıyq!», – dedi ol.
Estafeta qatysýshylary 14 kezeńnen turatyn jalpy qashyqtyǵy 5 335 m baǵyndyrady. Aıta ketý kerek, jarys elordadaǵy Jeńis dańǵyly men Bıgeldınov kóshesiniń qıylysynan sóreni (start) bastaıdy (mın.fın) – Álııa Moldaǵulova kóshesimen – Beıbitshilik kóshesinen – Otyrar kóshesine deıin júgirip ótedi.
«Birinshi kezeńnen bastap bizdiń ýnıversıtettiń stýdentteri ár kezeń saıyn birinshi jetip otyrdyq, mine ózderińiz kórgendeı eń sońǵy 14 kezeńdede 4 JOO arasynda da birinshi bolyp márege jettik. Bul estafeta jarysyna biz 1 jeti buryn barymyzdy salyp daıyndaldyq. Bizdiń Ýnıversıtet jyl saıyn osy jarysta júldeli oryndarǵa ıe bolady. Mine sol dástúrdi biz jalǵastyryp birinshi bolyp márege keldik. Men óz basym óte qýanyshtymyn. Dene shynyqtyrý pániniń aǵaıyna alǵysymdy aıtqymyz keledi», – dedi Astana Halyqaralyq ýnıversıtetiniń stýdenti, estafetaǵa qatysýshy Aıshabıbi Aıtbaı.
Aıta keteıik, atalǵan jarystyń maqsaty – QR Prezıdentiniń Qazaqstan halqyna joldaýyn júzege asyrý, sonymen qatar, Jalpy bilim beretin mektep oqýshylary, OAOO jáne JOO stýdentteri arasynda salaýatty ómir saltyn nasıhattaý, buqaralyq sport is-sharalaryn damytý bolyp tabylady. Jarysta júldeli oryndarǵa ıe bolǵan jeńimpazdar medaldarmen, komandalyq kýboktarmen jáne dıplomdarmen marapattaldy.