Aqtaýdaǵy lıftiler «qozǵala» bastady

Kóp qabatty úılerdiń «kóligi» – lıft. Aqtaýdaǵy lıftilerdiń jaǵdaıy biraz jyldar kúrdeli máselege aınalǵan-dy. Oryndary qıraı tozyp, qańqalary qalqıǵan lıftilerden de, ol máseleniń sheshilýinen de jurt kúderin ábden úzgendeı edi. Biraq, ótken jyly Aqtaý qalasynyń ákimi E.Jańbyrshın lıftige baılanysty jaqsy jańalyqty jurtshylyqqa jarııa etti. «Aqtaýdaǵy kóp qabatty úı­ler­degi jumys istemeı turǵan lıftiler jańartylady». Qala ákimi tarapynan aıtylǵan jańa­lyq jurtshylyqqa tez tarady. Ýáde oryndalýymen jaqsy emes pe, byltyrdyń ózinde qalada tórt jańa lıft iske qosylyp, tur­ǵyn­dardy qýanyshqa bóledi. Lıftilendirý isi bıyl da jalǵasyn tapty. О́ıtkeni, 2014-2018 jyldar aralyǵynda Aqtaý qalasynyń turǵyn úılerine jańa lıftilerdi ornatý boıynsha jasaqtalǵan is-sharalar jospary bul iske dem berdi. Lıft arzan dúnıe emes, al onyń baıyrǵy shahtalarǵa jaraıtyn túrin tabýdyń ózi qıyn eken. Kezinde lıftiler Aqtaýǵa sol kezdegi Lenıngrad qalasyndaǵy zaýyttan ákelinipti.  Bul joly da aqtaýlyq úılerdiń shahtasyna yńǵaıly lıftiler lıft jasaýǵa mashyqtanǵan  Reseıdiń Sankt-Peterbýrg qalasyndaǵy zaý­yttan satyp alyndy. Bıyl Aqtaýda 23 lıft qondyrý josparlanypty. Jýyrda 2013 jyldyń jel­toqsan aıynda satyp alynǵan 8 lıftini 7 qabatty eki úıge, 9 qabatty tórt úıge jáne 11 qabatty eki úıge ornatý úshin merdiger mekeme anyqtalyp, montajdaý ju­mystaryn bastap ketti. «Aq­taý qalalyq lıft» JShS montaj­daýdy úsh aı ishinde aıaqtap berýge ýáde etip otyr. Al qalǵan 15 lıftini ornatý úshin jumysty  jaýapkershilikpen moınyna alyp, júrgizetin merdiger mekemelerdi anyqtaý konkýrstary ótýde. – 2018 jylǵa deıin lıft qajet etiletin 108 úıge tolyqtaı ornatylady dep kútilýde. Olardy ornatý kezegi Aqtaý qalalyq jumyspen qamtý jáne áleýmettik baǵdarlamalar bóliminen alynǵan málimet negizinde múgedek jandar­dyń sanyna qaraı júzege asyrylady, – deıdi Aqtaý qalalyq ákimdiginiń baspasóz hatshysy Ba­tyr Jaılaýov. Kóp qabatty úılerde birneshe jyldar boıy ańǵal-sańǵal bolyp turǵan lıft oryndary jańaryp, jańǵyrýda. Qyzyǵyn kóretin turǵyndar, sondyqtan onyń bala-shaǵa men tentek-telilerdiń tep­kisinen, jazý-syzý, shımaı-shat­paqtan taza bolýyna turǵyndar atsalyssa ǵoı! Gúlaıym ShYNTEMIRQYZY, «Egemen Qazaqstan».   AQTAÝ.