Qasym-Jomart Toqaev pen Rejep Taııp Erdoǵan BAQ ókilderine brıfıng ótkizdi, dep habarlaıdy Egemen.kz Aqordaǵa silteme jasap.
Memleket basshysy eń aldymen ózin qasıetti Anadoly jerine memlekettik saparmen kelýge shaqyrǵany úshin Túrkııa Prezıdenti Rejep Taııp Erdoǵanǵa zor rızashylyǵyn bildirdi.
«Túrik halqyna jáne Prezıdent myrzaǵa qonaqjaılyǵy úshin alǵys aıtamyn. Biz búgin birqatar asa mańyzdy máseleler týraly keń aýqymdy kelissózder ótkizdik. Pikir almasý mazmundy, maǵynaly boldy. Prezıdent Rejep Taııp Erdoǵan bilimdi, asa bedeldi saıasatker. Onyń kózqarasy keń, sondyqtan bul kisiniń pikirleri óte qundy. Túrkııa – bizdiń táýelsizdigimizdi alǵashqy bolyp moıyndaǵan el. Ony qazaq halqy eshqashan umytpaıdy. Qazaqstan –Túrkııadan eshqashan da, eshqandaı da zııan shekpegen el. Áli de solaı jalǵasyp keledi. Qazaqstan men Túrkııa – tamyrlas, baýyrlas, dostas memleketter. Bizdiń sheteldegi alǵashqy elshiligimiz Ankarada ashylǵan. Munyń sımvoldyq máni zor. Qazaqstan men Túrkııa arasynda dıplomatııalyq qatynas ornaǵanyna bıyl 30 jyl toldy. Osy kezeńde bizdiń yntymaqtastyǵymyz nyǵaıyp, strategııalyq seriktestikke aınaldy. Aýqymdy sharttyq-quqyqtyq negiz qalyptasty. Saýda-ekonomıkalyq jáne mádenı-gýmanıtarlyq baılanys, jahandyq jáne óńirlik qurylymdar aıasyndaǵy yqpaldastyq oıdaǵydaı damyp kele jatyr», dedi Qazaqstan Prezıdenti.
Qasym-Jomart Toqaev Altaıdan bastalǵan qazaq kóshiniń qasıetti Anadoly topyraǵyna jetkenine bıyl 70 jyl tolǵanyn atap ótip, qandastarymyzdy sol kezdegi Túrkııa Premer-Mınıstri Adnan Menderes qushaq jaıa qarsy alǵanyn eske aldy. Sondaı-aq jaqynda Almaty qalasyndaǵy kóshege Túrkııanyń osy bir asa kórnekti saıasatkeriniń esimi berilgenin aıtty.
«Túrik jurty Qazaqstanǵa árdaıym tilektes ári janashyr ekenin bilemiz. Muny udaıy sezinemiz. Búgingi ekijaqty kezdesýdiń nátıjesinde mańyzdy kelisimderge qol jetkizdik. Bul sapar saıası, saýda-ekonomıkalyq, ınvestısııalyq, mádenı-gýmanıtarlyq, áskerı-tehnıkalyq jáne basqa da salalardaǵy yntymaqtastyqty odan ári nyǵaıtýǵa múmkindik beredi. Ásirese, Transkaspıı halyqaralyq kólik baǵdarynyń áleýetin tolyq paıdalanýǵa eki el de múddeli», dedi Memleket basshysy.
Prezıdent geosaıası ahýal ýshyǵa túsken qazirgi kezde munyń mán-mańyzy aıryqsha ekenin aıtyp, qazaq-túrik yntymaqtastyǵyn jańa deńgeıge kóterý úshin Keńeıtilgen strategııalyq seriktestik týraly birlesken málimdeme qabyldaǵandaryn jetkizdi. Sonymen qatar túrli saladaǵy baılanysty jańa beleske kóteretin mańyzdy úkimetaralyq qujattarǵa qol qoıyldy.
«Bul – baýyrlastyǵymyzdy bekemdep, yqpaldastyǵymyzdy nyǵaıta túsetin mańyzdy qadam. Qazaqstan men Túrkııa Eýrazııa qurlyǵynda beıbitshilik pen turaqtylyqty qamtamasyz etýge basa mán beredi. Osy rette, eki el halyqaralyq jáne aımaqtyq deńgeıde tyǵyz yqpaldastyq ornatqa», dep atap ótti Qasym-Jomart Toqaev.
Prezıdenttiń paıymynsha, Úkimetaralyq ekonomıkalyq komıssııa saýda-ekonomıkalyq seriktestikti nyǵaıtýǵa zor septigin tıgizedi. Sondaı-aq, Túrki memleketteri uıymy mańyzdy ról atqarady.
«Byltyr Túrkitildes memleketterdiń yntymaqtastyq keńesi tolyqqandy uıym bolyp qaıta qurylǵany qýantarlyq jaıt. Bul – bárimizge ortaq jetistik. Biz osy uıymnyń aıasyndaǵy jumysty jalǵastyra berýge múddelimiz. Sonymen qatar, bilim jáne mádenıet salasyndaǵy baılanysty odan ári damytamyz dep kelistik. Bul uıym Qazaqstan úshin asa mańyzdy, sondyqtan biz ony únemi qoldaımyz. Jalpy, Qazaqstan men Túrkııanyń jan-jaqty qarym-qatynasyn nyǵaıtýǵa mol múmkindik bar. Búgingi mańyzdy ýaǵdalastyqtar – sonyń aıqyn kórinisi. Meniń memlekettik saparym Qazaqstan men Túrkııa arasyndaǵy qarym-qatynasqa tyń serpin beretinine kámil senemin», dedi Memleket basshysy.
Prezıdent osy baılanysty odan ári nyǵaıtý úshin Qazaqstanda joǵary deńgeıde ekijaqty kezdesý ótkizý asa mańyzdy dep atap, Túrkııa Prezıdenti, Rejep Taııp Erdoǵandy elimizge saparmen kelýge shaqyrǵanyn jetkizdi. Sol kezde Nur-Sultan qalasynda Joǵary deńgeıdegi strategııalyq yntymaqtastyq keńesiniń tórtinshi otyrysy ótkizilmek.
Qasym-Jomart Toqaev sóziniń sońynda eki eldiń árdaıym bir-birine qoldaý kórsete otyryp, tabysqa birge jetetinine senim bildirdi.
Túrkııa Prezıdenti Rejep Taııp Erdoǵan eki el arasyndaǵy yntymaqtastyqty odan áli ilgeriletýge daıyn ekenin atap ótti.
«Qazaq baýyrlarymyzdyń turaqtylyǵy men tynyshtyǵyna asa múddeli ekenimizdi jáne saýda-ekonomıkalyq, mádenıet, qaýipsizdik salalarynda birge bolatynymyzdy aıtqym keledi. Biz ekijaqty jáne kópjaqty qatynastarymyzdy nyǵaıta beremiz dep kelistik. BUU, Islam yntymaqtastyq uıymdaryndaǵy birligimizdi arttyramyz. Atamekenimizden kelip otyrǵan Prezıdent Qasym-Jomart Toqaev myrza men onyń qurmetti delegasııasynyń kelgenine asa qýanyshtymyz», dedi Túrkııa Prezıdenti.