Búgin AMANAT-tyń Ortalyq apparatynda partııaǵa saltanatty qabyldaý rásimi ótti, dep habarlaıdy Egemen.kz partııanyń baspasóz qyzmetine silteme jasap.
Bıznes, úkimettik emes uıymdar, basqa da túrli sala ókilderi jáne belsendi jastar AMANAT qataryn tolyqtyrdy.
Saltanatty rásimdi ashqan AMANAT-tyń Atqarýshy hatshysy Ashat Oralov partııa – bul eń aldymen ortaq qundylyq aıasynda birikken múddeles azamattardyń uıymy ekenin atap ótti.
«Qazir partııa transformasııalaný kezeńinde. Bul rette AMANAT elimizdiń basty saıası kúshi jáne Memleket basshysynyń qoǵamdaǵy tiregi bolyp qala beredi. О́zderińizge málim, Prezıdent Qasym-Jomart Toqaev aýqymdy saıası reformalar paketin jarııalap, elimiz ózgerister jolyna tústi. Maýsym aıynda jalpyhalyqtyq referendým ótedi jáne oǵan árbir partııa múshesiniń, árbir azamattyń qatysýy – bizdiń ortaq boryshymyz», dep atap ótti Ashat Oralov.
Atqarýshy hatshy AMANAT-tyń transformasııalaýǵa qatysty jobalaryn sapaly iske asyrýǵa partııanyń jańa músheleri óz úlesi men tyń ıdeıasyn qosady degen senim bildirdi.
Búgin partııa qataryna qosylǵandardyń arasynda – telejýrnalıst Maqsat Tolyqbaı, «Talap» KEAQ prezıdenti Oljas Ordabaev, «Ádilet» respýblıkalyq qaýymdastyǵynyń tóraıymy Dınara Qudaıqulova, «Qazaqstan Halqyna» Qoǵamdyq qory basqarma tóraǵasynyń orynbasary Lázzat Shyńǵysbaeva, «Qorǵan» múgedekter qoǵamdyq birlestiginiń basshysy Nurgúl Baıqazaqova, «Komfortstroı» JShS bas dırektory Bekzat Myrzahmet jáne taǵy basqalar bar.
«Talap» KEAQ prezıdenti Oljas Ordabaevtyń pikirinshe, búginde qoǵam aldynda úlken syn-qaterler tur, olardy eńserý úshin birigý qajet. «Sondyqtan AMANAT partııasyna qosylý – bárimiz úshin de aıtýly oqıǵa. Biz partııa men eldi odan ári kórkeıtý úshin bar kúsh-jigerimizdi salamyz», dedi Oljas Ordabaev.
О́z kezeginde, telejýrnalıst Maqsat Tolyqbaı azamattardyń problemalaryn sheshý úshin AMANAT partııasynyń zor áleýeti bar ekenin atap ótti. «Maǵan túrli máselelermen jıi júginedi, jýrnalıst retinde olardy qoǵamǵa, memlekettik organdarǵa jetkizýge tyrysamyn. Endi partııa qataryna qosylý arqyly mende olardy sheshýdiń taǵy bir quraly bolady», dedi ol.
«Biz barlyq salada transformasııa kezeńin bastan ótkerip jatyrmyz jáne «AMANAT» partııasy osy istiń aldyńǵy shebinde tur. Partııa qataryna qosylý – bir jaǵynan jańa múmkindikterge jol ashsa, ekinshi jaǵynan úlken jaýapkershilik júkteıdi», dedi saıasattanýshy, jýrnalıst Saıat Jóken.
«Jastar Alaýy» qorynyń tóraıymy Dılıara Begalyqyzy partııa qataryna qosylý – elimizdiń damýyna óz úlesin qosý úshin taǵy bir múmkindik beretinin atap ótti. «Jastar memleket pen qoǵamnyń qozǵaýshy kúshi bolýy tıis. Dál osy partııa jastardyń ómir sapasyn arttyryp, áleýetin asha alatynyna senimdimin», dep óz oıymen bólisti Dılıara Begalyqyzy.
Partııa qataryna qabyldaý AMANAT-tyń barlyq óńirdegi fılıaldarynda ótip jatyr.