Túrkistan oblysynyń Saýran aýdanyndaǵy Maıdantal orta mektebin alys-jaqyndaǵy aǵaıyndar jaqsy biledi. Alaıda bul mekteptiń ataǵy ustazdarynyń biliktiligi nemese oqýshylarynyń túrli sımpozıýmdar men bilim olımpıadalarynda top jarýymen shyqqan joq.
Osydan jıyrma jyl buryn jertóledegi býdyń saldarynan irgetasy sógilip, qabyrǵasy qaqyrap, kún sanap jerge shógip bara jatqan soń, jergilikti ustalar tórt jaǵynan temirmen qursaýlap, relske tiginen bekitip tastaǵan. Mine, sodan beri qulap qalmaı turǵanyna el áli kúnge deıin qaıran qalady. Jıyrma jylda myńnan astam túlek tóbesine kirpish qulamaı, aman-esen mektep bitirip ketti.
Maıdantal mektebiniń dırektory Qýanysh Rysbaev bolsa, qansha jyldan beri jańa mektep saldyrtýǵa tapsyrys berilgenimen, oryndalmaı kele jatqanyn aıtady. Bıylǵy jyly Saýran aýdany boıynsha on eki mektepke kúrdeli jóndeý jumystary júrgizilse, Asha, Qyzylásker, Qojanov, Abaı aýyldarynda jańa mektepter salynady eken. Olardyń qatarynda Maıdantal mektebi joq. Saýran aýdanynyń ákimi Ǵanı Rysbekov qurylǵanyna bir jyl endi tolǵan jańa aýdandaǵy barlyq otyzdan astam aýyldy birneshe qaıtara aralap shyǵyp, jergilikti turǵyndarmen kezdesýler ótkizipti. Maıdantaldaǵy mekteptiń jaǵdaıynan tolyq habardar eken. Al biraq jańa oqý oshaǵynyń qashan boı kóteretini áli belgisiz...
Eskendir ERTAI,
jýrnalıst
Túrkistan oblysy