Elordadaǵy medısınalyq ortalyqta 1189 adam esirtkige qumarlyqtan arylý úshin em alyp jatyr. Bul týraly Nur-Sultan qalasy qoǵamdyq densaýlyq saqtaý basqarmasy basshysynyń orynbasary Gúlnaz Dosmyrzaeva málim etti, dep habarlaıdy Egemen.kz.
«Qazirgi ýaqytta narkologııalyq ortalyqta 1189 pasıent em alyp jatyr. Olardyń arasynda 658-i opıoıd zatyn qoldanǵandar, 226-y psıhoaktıvti zattardy qoldanýshy jáne 248 emdelýshi stımýlıator psıhotroptyq zattaryn qoldanǵan. Kámelet jasyna tolmaǵandar arasynda esirtki men psıhoaktıvti zattardyń zııany týraly 26 medısınalyq aqparattandyrý sharasy uıymdastyryldy», dedi Gúlnaz Dosmyrzaeva qalalyq máslıhattyń otyrysynda jasaǵan baıandamasynda.
Onyń málimdeýinshe, búginde esirtkige táýeldilikten arylý maqsatynda em alyp jatqandardyń úlesi 4 paıyzǵa artqan.
«Osyǵan deıin 707 pasıent táýlik boıy jumys isteıtin stasıonarda medısınalyq-áleýmettik ońaltýdan ótti. Atap aıtqanda, 599 azamat ishimdikke táýeldi jáne 171 naýqas esirtkige táýeldi. Jalpy alǵanda ishimdikke táýeldiler 78 paıyzdy quraıdy, opıoıd zatyna táýeldiler 49 paıyz jáne psıhoaktıvti zattarǵa qumartýshylardyń úlesi 74 paıyzdy qurap otyr», deıdi ol.