BQO boıynsha qylmystyq-atqarý júıesi departamentiniń baspasóz qyzmeti málim etkenindeı, telefondardy alyp ótý oqıǵasy 18 mamyr kúni qaýipsizdigi barynsha joǵary mekemede bolǵan, dep habarlaıdy Egemen.kz.
«Mekemeniń jedel qyzmetkerlerine túrme aýmaǵyna tyıym salynǵan zattardy alyp ótýge daıyndyq júrip jatqany jóninde aqparat túsken. «B» jeke mekemesiniń «T» esimdi júrgizýshisiniń avtokóligin tekserý barysynda aýa kompressory ballonynan 38 uıaly telefon tabylǵan. Onyń 30-y – smartfon. Sondaı-aq 42 qýattaý qurylǵysy, 10 symsyz jáne 3 symdy qulaqqap shyqqan», dedi RÝ-170/3 mekemesiniń bastyǵy, ádilet polkovnıgi Magnıs Sabyrov.
Oqıǵa ornyna jedel tergeý toby shaqyrtylyp, tyıym salynǵan zattardy tárkileý aktisi túzildi. Qazir atalǵan derek boıynsha qyzmettik tekserý júrgizilip jatyr.