Batys Qazaqstan oblysynda shekarany zańsyz kesip ótken ózbekstan azamaty izdestirilip jatyr, dep habarlaıdy Egemen.kz.
QR UQK Shekara qyzmetiniń baspasóz qyzmeti málimetinshe, 1991 jyly týǵan ózbekstandyq Ýsmon Saıdjalolovqa qatysty QR QK 392-baby 1-bóligine (QR memlekettik shekarasyn qasaqana zańsyz kesip ótý) sáıkes qylmystyq is qozǵalǵan. Onyń qasynda 2016 jylǵy uly da bar.
«22 mamyr kúni Ý.Saıdjalolov tergeý amaldaryn júrgizý úshin shekara qyzmeti departamentine shaqyrtylǵan bolatyn. Alaıda ózbekstandyq azamat kelmeı, belgisiz baǵytta boı tasalaǵan. Qazirgi kezde onyń ulymen birge qaıda júrgeni belgisiz. Erekshe belgileri: boıy 165-170 sm, orta deneli, shashy qara, ústine qara kúrte, sur djınsy, aıaǵyna qara krossovka kıgen. Qazaqstan shekarasynan zańsyz, ótkizý beketine soqpaı nemese jalǵan qujatpen ótýi yqtımal», dep habarlady vedomstvodan.