Kenshiler astanasyndaǵy NIS túlegi Anel Júnisovany Garvardtaǵy áıgili Harvard Medical School mektebi taǵylymdamadan ótýge shaqyrdy. Bilimimen baǵy janǵan jas daryn Nazarbaev zııatkerlik mektebin 2018 jyly bitirgen bolatyn.
Qolyna attestat alǵannan keıin Anel Júnisova Ońtústik Koreıadaǵy Ulsan National Institute of Science and Technology dep atalatyn oqý ornyna túsip, «Bıomedısınalyq ınjenerııa» jáne «Bıznes-ákimshilik» mamandyqtary boıynsha qos dıplom baǵdarlamasyn tańdady.
Ýnıversıtette júrgeninde ol ǵylym men qoǵamdyq jumysty ushtastyryp, belsendiligimen kózge tústi. Atap aıtqanda, Anel eki jyl boıy 50 ult ókilinen turatyn UNIST Halyqaralyq stýdentter uıymynyń prezıdenti boldy. Buǵan qosa ol NIS Alumni-diń Ońtústik Koreıadaǵy fılıalyn qurdy. Onyń baǵdarlamasy boıynsha jergilikti joǵary oqý oryndaryna túsýge 600-den astam talapker úshin tegin tálimgerlikti qamtamasyz etýge jáne túrli is-sharalardyń kómegimen Qazaqstannan Ońtústik Koreıaǵa kelgen stýdentterdi biriktirýge qarjy bólindi.
Munyń ózi Anel Júnisovaǵa Sıngapýr ulttyq ýnıversıteti janyndaǵy aýrýhananyń bir bóligi sanalatyn Sıngapýr klınıkalyq zertteýler ınstıtýtynda aqyly taǵylymdamadan ótýge jol ashyp, ol jarty jylǵa Koreıadan osy elge kóship bardy.
Anel óziniń osyndaı sheshim qabyldaǵanyna qýanyshty ekenin aıtady. О́ıtkeni dál osy jerde pedıatrııalyq nevrologııa bóliminde ózi armandaǵan baǵytymen qaýysha aldy.
– Men 3-7 jas aralyǵyndaǵy balalarda aýtıstik buzylystyń damýy men paıda bolýyn zertteý boıynsha ózimniń zertteý jobamdy qarjylandyrý kózine qol jetkize aldym. Zertteýim MRT sýretterin, genetıkalyq bıomarkerlerdi jáne balalardyń jalpy psıhıatrııalyq jaǵdaıyn taldaýdyń pánaralyq ıntegrasııasyna negizdelgen, – deıdi jas ǵalym.
Garvardta Anel este saqtaý, alsgeımer, klınıkalyq depressııa prosesterin jáne aýtızmdi zerttemekshi. Naqtyraq aıtqanda, ol mıdy zertteýdegi irgeli kitaptardyń, nusqaýlyqtardyń jáne baǵdarlamalyq jasaqtamanyń avtorlarymen birigip jumys isteı otyryp, óziniń jobalaryn damytýdy jalǵastyrady.
Qaraǵandy oblysy