Májiliste «QR keıbir zańnamalyq aktilerine kólik máseleleri boıynsha ózgerister men tolyqtyrýlar engizý týraly» zań jobasy birinshi oqylymǵa shyǵaryldy, dep habarlaıdy Egemen.kz.
QR Indýstrııa jáne ınfraqurylymdyq damý mınıstri Qaıyrbek О́skenbaev Májiliste Zań jobasyn tanystyrdy. Onyń aıtýynsha, qujat Qazaqstan Respýblıkasynyń 4 kodeksi jáne 16 zańyna ózgertýler men tolyqtyrýlar engizýdi kózdeıdi.
«Zań jobasynyń negizgi maqsattary: joldarda kóliktik baqylaýdy avtomattandyrý; teńiz kóligi salasyndaǵy halyqaralyq sharttardyń normalaryn ımplementasııalaý; temirjol kóligindegi oqıǵalardy jáne kemelermen bolǵan avarııalyq jaǵdaılardy tergeý tártibin jetildirý; Qazaqstan Respýblıkasy zańnamasyn Halyqaralyq Azamattyq avıasııa uıymy standarttarynyń talaptaryna jáne Eýropalyq Odaqtyń avıasııalyq talaptaryna keltirý; áýeaılaq mańyndaǵy aýmaqta qyzmetti júzege asyrýǵa ruqsat alý tetigin retteý», dep túsindirdi Qaıyrbek О́skenbaev.
Júkti avtokólikpen tasymaldaýdyń qarqyny joǵary, jol tóseminiń merziminen buryn buzylý máselesi túbegeıli shara qabyldaýdy talap etedi. Osy maqsatta «Nurly jol» baǵdarlamasy boıynsha jolda kólik quraldarynyń salmaqtyq jáne gabarıttik parametrlerin ólsheıtin avtomattandyrylǵan stansalardy ornatý josparlanǵan.
«Zań jobasynda avtomattandyrylǵan ólsheý stansalaryn ornatý jáne olardyń jumys tártibin aıqyndaıtyn normalar kózdelgen. Bul rette stansalar adamnyń qatysýynsyz «Sergek» júıesi qaǵıdaty boıynsha jumys isteıtinin atap ótken jón. Usynylyp otyrǵan sharalar avtojoldardyń saqtalýyn qamtamasyz etýge jáne kóliktik baqylaý júrgizý kezinde adamı faktordy boldyrmaýǵa múmkindik beredi», dedi mınıstr.
Gúldana Elýbaı