Aýyldyń ózekti máselesiniń sheshimin tabýyna ózim de kiriskim keldi

Aýyldyń ózekti máselesiniń sheshimin tabýyna ózim de kiriskim keldi – deıdi jaqynda ǵana aýdandyq máslıhat depýtaty bolyp saılanǵan II toptaǵy múgedek Vıktor DERKACh

Sarykól aýdandyq máslıhatyndaǵy shyǵyp qalǵan depýtattyń ornyna Zlotaýst aýyldyq okrýginen II toptaǵy múgedek Vıktor Derkach depýtat bolyp saılandy. Oǵan tańǵalǵandar bolǵan joq, qaıta qýanǵandardyń qarasy kóp. Saılaýshylar biraýyzdan daýys berdi. Adamǵa adam nege qurmetpen qaraıdy? Adamnyń kemistigi nede, artyqshylyǵy nede? Vıktor Nı­kolaevıchti bilgen, onymen aralasqan jannyń barlyǵy da birden osy suraqtarǵa jaýap tapqandaı bolady. Adamnyń qadir-qasıeti onyń ómirge qul­shynysynda, adamgershiliginde bolsa kerek. Vıktor Derkach – II toptaǵy múgedek. Bári bala kezdegi abaısyzdyqtan boldy. Joq, abaısyzdyq emes, taǵdyrdan bolsa kerek. О́ıtkeni, onyń múgedek bolyp, aıaqsyz qalýyna 9 jasar Vıtıanyń eshqandaı kinási bolǵan emes. Tehnıkaǵa áýes edi. Iá, ulǵa tán minez. Traktor aıdaıtyn týysqan aǵasynyń qasynan úıi­rilip shyqpaıtyn. Ol Vıtıaǵa kómektes dep, bir temirin ustatyp qoısa, bul soǵan máz. Birde ekeýi tehnıkany taǵy da jóndedi. Aǵasy traktoryn júrgize bergende dońǵalaqtyń astynda qalǵan balanyń shyrylyn bir-aq estidi. Dárigerler balanyń aıaǵyn saqtaı almady, tizeden joǵary kesti. Bala kezde múgedek bolýdyń qasiretin basynan ótkizgen jan biler. Múgedektik túgili qatarynan nashar kıinýdiń ózi balanyń rýhyn túsirip, jasqanshaq etpeı me? Múmkin, keıbir taǵdyrdyń júgin arqalaǵan kisilerdiń kinámshil, ómirge ókpeli bolyp ósetini de sondyqtan bolar. Qoıý qasy, uıaly kózderi nurlanyp turatyn Vıktordan ondaı minezdi eshkim baıqaı qoımaıtyn. Onyń ómirge qulshynysy ǵajap boldy. Jalǵyz aıaǵymen júgirip, oıynnan qalmaı, balalardyń arasynda shaýyp júretin. Aýyl balalary velosıped tepse, bul da velosıped tepti, ózenge shomyldy, balyqtaı júzdi. Tipti, shańǵy da teýip kórdi. – Qazir oılasam, meniń bala kezden-aq ishki rýhym myqty bolǵan eken. Eshqandaı moıyǵan emespin. Ata-anama kómektestim, baqsha kútýden de, mal jaılaýdan da tartynǵan emespin. Oqýdan da qalǵan joqpyn. Kórshilerimizdiń barlyǵy da meni balalaryna úlgi etetin. Otbasyn qurǵan kezimde bir kórshim boldy. Sonyń aıaq-qoly balǵadaı, soqtaldaı uly bar edi. Sol jigittiń uıqydan qoly tımeıtin, bir kerjalqaý. Men biraz mal ustaımyn, shóbimdi ýaqtyly oryp, otynymdy ýaqtyly túsirip alamyn. Esiktiń aldyndaǵy baý-baqsham ol, jaınap turady. Sonda álgi kisi balasyna meni úlgi etip, keıip jatatyn edi, – deıdi Vıktor Nıkolaevıch. Mektepti bitirgen soń eńbek jolyn aldymen Soltústik Qazaqstan oblysyn­­daǵy Kıllın elevatorynda tarazyshy bolyp bastady. Biraq aqyldy jigit edi, mamandyq alý kerek ekenin oılady. Sóıtti de, Omby qalasyndaǵy №62 tehnıka­lyq ýchılıshesinde oqyp, kınomehanık mamandyǵyn alyp shyqty. 80-shi jyldary áıeliniń ata-anasyna jaqyn bolý maqsatymen, Qostanaı oblysynyń Sarykól aýdanyndaǵy Krasnodon aýylyna kóship keldi. Osynda tabany kúrekteı 13 jyl kınomehanık bolyp istedi. Al 90-jyldary kelgen aýyl sharýashylyǵyndaǵy daǵdarys kimdi aıady? Ataqty «Krasnodon» asyl tuqymdy jylqy sharýashylyǵynyń qazir qaıda qalǵany belgisiz. – Krasnodon aýylynda jyl saıyn alaman báıge bolar edi, elimizdiń ár shalǵaıynan nebir sáıgúlikter qosylatyn. Krasnodonnyń jylqylary da tamasha edi-aý!.. Báıge bolar kúndi asyǵa kútip júrer edik. Atqumarlyq bizge de juǵysty bolǵan ǵoı, – dep eske alady Vıktor sol kúnderdi. Odan keıingi jyldary krasnodondyqtar kúnkóristiń sońynda ketti. Jan-jaqqa bytyraı kóshti. Al Vıktor esh jaqqa qozǵalǵan joq. Qolynan kelgenshe saýdamen aınalysty. Áıeli ekeýi dúken ashty, qaladan taýar ákelip satty. Solaı tıynnan teńge qurap, bıznesin damyta berdi. Onyń syrtynda qoradaǵy maly, baý-baqshasyn da tozdyrǵan joq. Uly men qyzyn oqytty, birin úılendirip, birin uzatty. Qolynan kelgenshe aýyldas­taryna kómek qolyn sozdy. Úsh adamǵa jumys ornyn berdi. Aıadaı aýylǵa bul az kómek pe? 2007 jyldan bas­tap «Nur Otan» partııasyna múshelikke kirdi. Qazaqstan Respýblıkasy Parlamenti Máji­lisiniń jáne Prezıdent saılaýlary naýqanynda belsene jumys istedi. Prezıdenttiń jyl saıynǵy joldaýlaryn nasıhattaıdy. – Prezıdent Nursultan Nazar­baevtyń bıylǵy Joldaýynda 2015 jyldan bas­­tap múgedekter men asyraýshysynan aıyrylǵandarǵa 25 paıyz kóleminde jár­dem­aqyny kóbeıtý týraly aıtqan she­shimi meniń júregimdi tolqytty. Bir qadam júrýge zar bolyp otyr­ǵandar, zaǵıp­tar, kúni adamǵa qarap qalǵan ǵarip jandar úshin bul qandaı qamqorlyq deseńshi, deıdi Vıktor Derkach. Onyń saı­laýaldy baǵdarlamasynda da múmkindigi shekteýli jandarǵa qoldaý kórsetý máselesi bar. Sonymen qatar, aýyldastarynyń turmys deńgeıi depýtattyń basty nazarynda. Munda sharýashylyq tozǵaly onymen birge jol da tozdy, buryn Esilden tartylǵan aýyzsýdyń qubyrlary qańyrap qalǵan. Qazir osy eki másele aýyldaǵylardy sharshatyp tur. – Aýylda jastar qalmaı bara jatyr. Adamdardyń mádenı demalysyn uıymdastyrý jáne jasóspirimderdiń quqyq buzý­shylyǵynyń aldyn alýdy da aýyl­dastar amanat etip tapsyrdy, deıdi Vıktor Nıkolaevıch. Ol aýdandyq máslıhattaǵy depýtattyń bosaǵan ornyna óz kandıdatýrasyn ózi usyndy. Sebebi, aýyldan eshqaıda ketpeıdi. Eger qalada turǵysy kelse, kóship ketýge shamasy jeter edi. – Men aýylda týǵanmyn, ósken­min. Aýyl jaqsy ǵoı. Ondaǵy qolǵa alatyn máselelerdiń sheshi­min tabýyna ózim de úles qos­qym keldi, deıdi Vıktor Derkach. Sarykól aýdandyq máslı­hatyn­daǵy jańa depýtat qazir iske qul­shyna kirisip te ketken. Onyń boıynda jaýaptylyq, uıym­das­tyrýshylyq, bilimdilik pen bilik­tilik sııaqty qasıettiń barlyǵy bar. Máslıhatqa jańa lep keldi. Názıra JÁRIMBETOVA, «Egemen Qazaqstan». Qostanaı oblysy, Sarykól aýdany.