Vatıkanǵa resmı saparmen kelgen Qazaqstan Respýblıkasy Premer-Mınıstriniń orynbasary – Syrtqy ister mınıstri Muhtar Tileýberdi Rım Papasy Fransısktiń jeke qabyldaýynda boldy. Bul týraly QR Syrtqy ister mınıstrliginiń baspasóz qyzmeti málim etti, dep habarlaıdy Egemen.kz.
Apostol saraıynyń Papa kitaphanasynda ótken kelissózder barysynda Pontıfık Qazaqstan Vatıkannyń Ortalyq Azııadaǵy senimdi seriktesi ekenin atap ótti. Rım-Katolık shirkeýiniń basshysy QR Prezıdenti Qasym-Jomart Toqaevtyń «Jańa Qazaqstandy» qurý jáne Konstıtýsııaǵa ózgerister engizý boıynsha aldaǵy jalpyulttyq referendým ótkizý aıasyndaǵy saıası jáne ekonomıkalyq reformalaryna joǵary baǵa berdi. Taraptar aǵymdaǵy jyldyń qyrkúıek aıynda Qazaqstan astanasynda ótetin Álemdik jáne dástúrli dinder lıderleriniń VII seziniń kún tártibin talqylady.
Pontıfık Qazaqstannyń konfessııaaralyq kelisim men dinaralyq dıalogty ilgeriletýge qosqan úlesin rızashylyqpen atap ótti. Rım Papasy Fransısktiń Qazaqstanǵa memlekettik saparmen kelýi jáne sezd jumysyna qatysýy týraly tarıhı sheshimi erekshe atap ótildi.
Mınıstr Rım Papasynyń saparyn tek Qazaqstannyń ǵana emes, búkil Ortalyq Azııadan keletin katolıkter taǵatsyzdana kútetinin habarlady. Budan bólek, M.Tileýberdi Qasıetti Taqtyń Memlekettik hatshysy (Premer-Mınıstri) Kardınal Petro Parolınmen jáne Dinaralyq dıalog boıynsha Papa keńesiniń tóraǵasy kardınal Mıgel Anhel Aıýso Gıksotpen ekijaqty kelissózder júrgizdi.
Taraptar Qazaqstan men Qasıetti Taq arasyndaǵy rýhanı kelisim men ózara qurmet salasyndaǵy yntymaqtastyqty odan ári damytý máselelerin talqylady.
Konfessııaaralyq dıalogty damytýǵa, sondaı-aq Álemdik jáne dástúrli dinder lıderleri seziniń ıdeıalaryn ilgeriletýge qosqan qomaqty úlesi úshin M.Tileýberdi Memleket basshysynyń atynan M.A. Aıýso Gıksotqa II dárejeli «Dostyq» ordenin tapsyrdy.