Prezıdent Ulttyq ǵylym akademııasy ǵylymı oı-tujyrym ortalyǵyna jáne saraptama jasaıtyn bedeldi mekemege aınalýǵa tıis ekenin aıtty. Memleket basshysy bul oıyn akademııanyń 75 jyldyǵyna arnalǵan saltanatty sessııa barysynda málimdedi, dep habarlaıdy Egemen.kz Aqordaǵa silteme jasap.
«Qara shańyraqtyń rólin arttyrý asa mańyzdy. Sondyqtan, oǵan memlekettik mártebe beremiz jáne bıýdjet esebinen qarjylandyramyz. Onyń qazir atqaryp otyrǵan qyzmetinen basqa da mindetterin naqty belgileý qajet. Atap aıtqanda, ǵylymı basymdyqtardy dál osy qurylym aıqyndaýy kerek. Arnaýly granttar, stıpendııalar jáne syılyqtar taǵaıyndaý quzyreti de Akademııaǵa berilgeni jón», dedi Prezıdent.
Osy rette Memleket basshysy ǵylymǵa adaldyq máselesine basa nazar aýdardy.
«Qazir qoǵamda qur ataq úshin ǵylymı dáreje alǵysy keletinderdiń bar ekeni jasyryn emes. Bul jaǵymsyz úrdiske aınalyp barady. Olar, shyn máninde, ǵylymı ataqqa ıe bolǵanymen, ǵylym jolyn jalǵastyrmaıdy. Sonyń kesirinen memlekettiń qanshama qarajaty bosqa ketedi. Buǵan birjola tosqaýyl qoıatyn kez keldi. Biz ǵylymǵa shynaıy berilgen azamattardy ǵana qoldaýymyz qajet», dedi Qasym-Jomart Toqaev.